Perezida Kagame yavuze  ko ikindi cyagarura amahoro ari ugushakira umuti ibibazo bya politike mu mahoro, ibyo AFC/M23 isaba abayobozi ba Congo bijyanye no kwemera ukuri guhari.

Ibi yatangaje ni ibikubiye mu kiganiro yagiranye na Mario Nawfal cyagarutse ku bibazo bimaze igihe mu burasirazuba bwa Repubulika Iharanira Demokarasi ya Congo.

Ubwo Perezida Kagame yabazwaga icyo yabwira Tshisekedi baramutse bari kumwe, yavuze ko yamubwira ko yakwifuje ko atagakwiye kuba ari Perezida wa kiriya Gihugu cyiza, kandi ko ubutaha nibongera guhura agomba kuzabimubwira amaso ku maso.

Perezida Kagame muri iki Kiganiro, yakomoje  ku kibazo cy’umutwe wa  FDLR wasize uhekuye u Rwanda mu 1994, avuga ko cyaganiriweho hagati y’u Rwanda n’ubutegetsi bwose bwagiye bubaho muri DRC, burimo n’uburiho ariko usanga ntacyo bwagiye bubikoraho.

.Ubwo umunyamakuru Mario Nawfal yabazaga  Perezida Kagame icyo Tshisekedi yakivuzeho, yavuze ko ashobora kuba afite ingengabitekerezo ya Jenoside. Yagize ati “Ndatekereza ko afite ingengabitekerezo ya Jenoside. Ni ko mbibona arayifite.”

Perezida Kagame yavuze ko yagiye agaragaza ibyo bibazo kenshi ariko aho Tshisekedi agiriye ku butegetsi cyarushijeho kuremera.

Perezida Tshisekedi yagiye yumvikana mu mvugo zihembera inzangano no gushaka gushoza intambara ku Rwanda. Yagiye  ashinja u Rwanda ko rufasha abarwanyi ba M23 ndetse ahigira ko  azarurasaho yibereye i Goma