Ku wa Gatanu Tariki ya 27 Werurwe 2026 Umuyobozi w’Akarere ka Ngoma, Madamu Niyonagira Nathalie, ari kumwe na Bwana Rurangwa Tito, Umuyobozi ushinzwe ibikorwa tekinike mu mushinga Rusumo Power Company Ltd, ndetse n’itsinda ry’abakozi b’uyu mushinga, basuye ibikorwa bigamije guteza imbere imibereho y'abaturage byatewe inkunga n’uwo mushinga mu Karere ka Ngoma.

Mu bikorwa basuye harimo umushinga wo kwegereza abaturage amazi meza, inzu y’urubyiruko ndetse n’isoko rya Rukira. Ibi bikorwa byose bikaba bifite uruhare runini mu kuzamura imibereho myiza y’abaturage no guteza imbere impano z’urubyiruko.

Umuyobozi w’Akarere Madamu Niyonagira Nathalie yashimiye cyane umushinga wa Rusumo Power Company Ltd kubera ubufatanye ufitanye n’Akarere ka Ngoma, mu guteza imbere imibereho y'abaturage.

Yagize ati “Turashimira byimazeyo umushinga wa Rusumo Power Company Ltd ku ruhare yagize mu guteza imbere imibereho myiza y’abaturage b’Akarere ka Ngoma. Ibikorwa nk’ibi byo kubegereza amazi meza, kubaka inzu z’urubyiruko n’amasoko bifasha abaturage kwiteza imbere no kongera amahirwe y’akazi. Ubufatanye ni ingenzi mu rugendo rwacu rwo kugera ku iterambere rirambye.” 

Umuyobozi ushinzwe ibikorwa tekinike muri Rusumo Power Company Ltd Bwana Rurangwa Tito yashimye imikoranire myiza n’Akarere ka Ngoma anashimangira intego y’umushinga mu guteza imbere imibereho y’abaturage.

Yagize ati “Nk’umushinga wa Rusumo Power Company Ltd, twiyemeje kudatanga amashanyarazi gusa, ahubwo no kugira uruhare mu iterambere ry’abaturage duturanye. Ibi bikorwa twasuye uyu munsi bigamije guteza imbere imibereho y’abaturage no kubafasha kubona serivisi z’ibanze zibafasha kwiteza imbere cyane cyane mwabonye ko urubyiruko rwabonye amahirwe yaho bihugurira ibijyanye n’ikoranabuhanga.”

Umushinga Rusumo Power Company Ltd mu Karere ka Ngoma wateye inkunga ibikorwa bitandukanye, birimo kwagura isoko rya rukira, kubaka ikigo nderabuzima cya Kazo na Karembo, isoko rya gafunzo, kubaka inzu y’urubyiruko no kwegereza amazi meza abaturage ndetse bakaba baherutse no gutanga imbangukiragutaba mu Bitaro bya Kibungo ifite agaciro ka miliyoni 120.

Ubuyobozi bw' Akarere ka Ngoma buvuga ko buzakomeza gukorana neza n'abafatanyabikorwa mu gushaka ibisubizo ku bibazo by'abaturage.