Kinyarwanda
English
Swahili
Louise Mushikiwabo yakiriye Min. Nduhungirehe baganira ku myiteguro y’inama ya Francophonie izabera i Kigali
Umunyamabanga Mukuru w’Umuryango w’Ibihugu bikoresha Igifaransa (Organisation Internationale de la Francophonie – OIF), Madame Louise Mushikiwabo, yakiriye Minisitiri w’Ububanyi n’amahanga n’ubutwererane w’u Rwanda, Amb. Olivier Nduhungirehe, mu biganiro byibanze ku myiteguro y’Inama y’Abaminisitiri b’Umuryango wa Francophonie (Conférence Ministérielle de la Francophonie) iteganyijwe kubera i Kigali ku wa 19–20 Ugushyingo 2025.
Ibiganiro byabereye ku cyicaro cya OIF i Paris mu Bufaransa, byibanze ku kurebera hamwe aho imyiteguro igeze, uburyo bwo kunoza imikoranire hagati ya guverinoma y’u Rwanda na OIF, ndetse no kwiga ku nsanganyamatsiko izayobora iyo nama y’ingenzi izahuriza hamwe abaminisitiri b’Ububanyi n’Amahanga b’ibihugu birenga 80 bigize uyu muryango.
Inama y’Abaminisitiri b’Umuryango w’Ibihugu bikoresha Igifaransa ni imwe mu nama z’ingenzi zibanziriza Inteko Rusange y’Abakuru b’Ibihugu na za Guverinoma (Sommet de la Francophonie), aho hagenzurwa ishyirwa mu bikorwa ry’imyanzuro y’iyo nteko, ndetse hanemezwa ibikorwa by’umuryango ku rwego mpuzamahanga.
U Rwanda, ruri muri OIF kuva mu mwaka wa 1970, rumaze kugaragaza uruhare rukomeye mu guteza imbere indangagaciro za Francophonie zirimo uburezi, amahoro, uburinganire, n’iterambere rihuriweho. Kigali, imaze kubaka izina nk’umujyi wakira neza inama mpuzamahanga, iriteguye neza kwakira abahagarariye ibihugu bigize OIF mu Ugushyingo 2025.
