Inzoga n’Ubwamamare

Inzoga ni kimwe mu bintu bikunze kugendana n’imyidagaduro, ibirori, n’utubari, aho usanga ibyamamare byinshi biharangwa. Iyo umuntu amaze kuba icyamamare, akenshi ahura n’ibirori byinshi, abamushimira, abamufasha, n’abamwigana. Mu kwishimira ibyo byose, benshi bagwa mu bishuko byo kunywa inzoga mu buryo bwo kwishima.

Hari n’ibyamamare byifashisha inzoga mu guhangana n’agahinda, stress, cyangwa igitutu gituruka ku byo bategerejweho/ bitezweho batari kubasha kugeraho. Abandi bayikoresha kugira ngo barusheho kwiyumvamo ibyishimo cyangwa kugira imbaraga zo kwitwara imbere y’abantu benshi. Ariko uko inzoga yinjira mu buzima bw’icyamamare, ni nako ishobora kugenda yangiza byinshi: ikamutesha icyerekezo, ikamwicira isura, cyangwa ikamushora mu ngeso mbi.

Ingero: Hari ibyamamare byinshi mpuzamahanga byazahajwe n’inzoga nka Amy Winehouse, umuhanzi w’icyamamare wapfuye azize ibiyobyabwenge n’inzoga. No mu Rwanda, hari bamwe batakaje umwanya wabo mu itangazamakuru cyangwa mu muziki kubera gukoresha inzoga mu buryo bukabije.

Itabi n’Ubwamamare

Itabi, n’ubwo bikunze kugaragara ko rikoreshwa n’abantu benshi, byagiye bigaragara ko ibyamamare ari bo biganza cyane mu kurikoresha, cyane cyane abakinnyi ba filime n’abaririmbyi. Mu ndirimbo, mu mashusho y’amafilime no mu mafoto, ibyamamare byinshi bigaragara bitumagura itabi, bigatuma abantu bumva ko ari igikorwa kiza,  gifite isura y’icyubahiro, cyangwa ubusirimu.

Abantu batangiye urugendo rwo kuba icyamamare bashobora kwigana uko abandi bitwaye, bityo bagatangira kwiyumvamo ko bakwiye kunywa itabi kugira ngo bagire isura y’ibindi byamamare bafatiraho ikitegererezo. Ariko iyo ntangiriro y’itabi iba ishobora kubaganisha ku burwayi nk’indwara z’ubuhumekero, kanseri y’ibihaha, no kugira ubuzima buhora mu kaga.

Urugero: Abaraperi bakomeye ku Isi, Snoop Dogg ndetse na Wiz Khalifa bagaragara kenshi batumagura amatabi menshi kandi ahenze cyane mu mashusho y’indirimbo zabo no hanze mu buzima busanzwe, bigatera urubyiruko rwababafataga nk’icyitegererezo kubigana.

Ubusambanyi n’Ubwamamare

Mu buzima bw’ibyamamare, ubusambanyi ni kimwe mu bintu bikunze kugaragara cyane, ahanini bitewe n’uko kuba icyamamare bituma umuntu akundwa cyangwa yifuzwa na benshi. Ibyamamare byinshi biba bifite ubwisanzure bwo guhitamo abo baryamana nabo, rimwe na rimwe batitaye ku ndangagaciro cyangwa ku ngaruka.

Hari n’ibyamamare bikora ubusambanyi nk’ubucuruzi, aho bagaragaza imibiri yabo mu mafoto, amashusho cyangwa imbuga nkoranyambaga kugira ngo bagire/ bakurure abafana benshi. Itangazamakuru na ryo ridakangwa n’iyo myitwarire cyangwa iyo mico, naryo usanga kenshi rikwirakwiza ayo mashusho nayo mafoto mu mu bantu bigatuma Isi yose imenya uwo muntu. Ibi byose bituma ubusambanyi bwibasira cyane ibyamamare, bukabangiriza izina, imiryango ndetse rimwe na rimwe n’ubuzima.

Ingero: Hari ibyamamare byamenyekanye kubera amashusho y’ubusambanyi yasohotse ku mbuga nkoranyambaga, nk'uko byabaye kuri Kim Kardashian, Paris Hilton n’abandi. Mu Rwanda na ho, hari ibyamamare byagiye bivugwaho iby’ubuhemu bw’urukundo, gusambanya abakobwa bakiri bato, n’ibindi.

Kuki ibi byose bihurira ku bwamamare?

Hari impamvu nyinshi zituma inzoga, itabi n’ubusambanyi bihurira ku bwamamare:

• Igitutu cyo kuba icyitegererezo: Umuntu umaze kumenyekana ahura n’igitutu cyo guhora ku rwego rwo hejuru, guhora yishimye no gukora ibitangaza. Ibi bituma bamwe bashaka ibisubizo byihuse byo kwiyumva neza, bakagana inzoga cyangwa itabi.
• Kwishakira umunezero wihuse: Ibyamamare byinshi biba bifite amafaranga, umwanya n’ubwisanzure. Ibi bituma bishora mu busambanyi cyangwa kunywa inzoga n’itabi nk’uburyo bwo kwishimisha.
• Kwiyumvamo ko ‘bakomeye’: Hari ababona ko kuba icyamamare bituma bemererwa gukora ibitemewe n’abandi, bakumva ko bafite uburenganzira bwo kwishora mu mibonano mpuzabitsina no kunywa uko basbihatse.

Ingaruka ku buzima bw’ibyamamare n’ababakurikira

Inzoga, itabi n’ubusambanyi bigira ingaruka zikomeye ku buzima bw’ibyamamare:

• Kubura icyerekezo: Umuhanzi cyangwa umukinnyi wa filime ashobora kwangiza umwuga we kubera ibyo binyuranye n’indangagaciro ahora yijandikamo.
• Ubwigunge n’agahinda: N’ubwo benshi bagaragaza ibyishimo mu ruhame, imbere baba bafite intimba n’umubabaro baterwa no kwiyangiza.
• Kwangiza urubyiruko: Abafana bafata ibyamamare nk’icyitegererezo, bityo bakigana imyitwarire yabo. Iyo myitwarire mibi yambukiranya ibisekuru, igasigira igihugu n’umuryango ibibazo byo mu rwego rw’imyitwarire.

Umusozo

Ubwamamare ni ingirakamaro iyo bubaye ku nyungu rusange, ariko bushobora no kuba umuvumo iyo budafashwe neza. Inzoga, itabi n’ubusambanyi ni inzira zishobora kubuza icyamamare kugira urumuri rurerure (uburambe) mu mwuga. Ibyamamare bikwiye guhora byibuka ko bifite inshingano yo kuba icyitegererezo ku rubyiruko no gushyira imbere indangagaciro nziza.

Ni ngombwa ko abashaka kuba ibyamamare babyitondera, bakirinda kwishora mu ngeso mbi, ahubwo bagaharanira kubaka izina rifite ubuziranenge, rifasha sosiyete, kandi rikazahora ryibukwa mu buryo bwiza.