Iyi nama yabaye kuri uyu wa 26 Werurwe 2026, yateguwe n’akarere ka Gicumbi ku bufatanye n’Urwego rw’Igihugu rw’Iterambere, Rwanda Development Board, hagamijwe kumurika ayo mahirwe no kuyageza ku bashoramari bashobora kuyabyaza inyungu.

Mu bayitabiriye harimo Minisitiri w’Ikoranabuhanga no guhanga Udushya, Paula Ingabire, Guverineri w’Intara y’Amajyaruguru, Maurice Mugabowagahunde, ndetse n’Umuyobozi Mukuru ushinzwe Ishoramari muri RDB, Michelle Umurungi, hamwe n’abandi bayobozi batandukanye.

Afungura iyi nama, Umuyobozi w’Akarere ka Gicumbi, Emmanuel Nzabonimpa, yagaragaje ko aka karere gafite amahirwe menshi y’ishoramari mu nzego zirimo ubuhinzi, ubworozi, gutunganya umusaruro w’ubuhinzi, ubukerarugendo n’ubucuruzi.

Yashimangiye ko Gicumbi ifite umusingi ukomeye ugaragarira mu butaka burumbuka, ikirere cyiza n’abakozi bagenda biyongera, ibintu bituma iba ahantu heza ho gushora imari.

Yanagarutse ku yandi mahirwe ari mu bijyanye n’imiturire n’amahoteli cyane cyane mu mujyi wa Byumba, aho hakenewe amasoko agezweho, amahoteli, amacumbi n’ibindi bikorwa by’ubucuruzi, ndetse no guteza imbere ubukerarugendo bushingiye ku bice birimo ikiyaga cya Muhazi n’ahandi hantu ndangamurage.

Ku ruhande rwa RDB, Michelle Umurungi yongeye gushimangira ko uru rwego rwiyemeje "gukomeza korohereza abashoramari binyuze muri serivisi zibafasha kuva ku kwiyandikisha kugeza ku ishyirwa mu bikorwa ry’imishinga, harimo n’ikorwa rya One Stop Centre."

Yagaragaje kandi ko ubufatanye bwa hafi hagati ya Leta n’abikorera ari ingenzi mu kwihutisha ishoramari muri Gicumbi, gukemura imbogamizi no gutuma imishinga ishyirwa mu bikorwa neza kandi ku gihe.