Ubushinjacyaha bubakurikiranyeho ibyaha bibiri;Gutangaza no gushyira ahagaragara amashusho y'urukozasoni hakoreshejwe mudasobwa cyangwa se urusobe rwa mudasobwa. 

Ababurana ari batatu bafungiwe muri gereza ya Mageragere mu gihe Kalisa John ari kuburana ari hanze.

Ni urubanza rwabaye ku itariki 04 Gicurasi 2026. Uzabakiriho Cyprien yabanje kuburana ahakana icyakora mu gusoza urubanza yabajijwe niba hari icyo yongeraho asaba ko yasubikirwa cyangwe se akagirwa umwere.

 Kwizera Papy Nestor yasabye gusubikirwa avuga ko igihe amaze muri gereza yize bihagije akaba yiteguye kwikosora.

Undi waburanye ni Ishimwe François Xavier wahakanye ibyaha byose mu gihe raporo ya Cyber yerekana ko yasakaje amashusho ya Yampano akanayacuruza. Umucamanza yamwibukije ko hari raporo yerekana ibiciro yishyurwaga kugirango atange ayo mashusho.

Kjohn nawe yaburanye avuga ko amashusho yayahawe ariko ntiyigeze ayasakaza. Yahakanye ko ibyavuzwe n'umutangabuhamya yabiteye utwatsi. Ati"Umutangabuhamya nyuma yansabye imbabazi avuga ko yari azi ko ari ugutwika".

Kjohn yavuze ko atigeze ayiha Papa Cyangwe. Uwunganira Kalisa John yasabye Urukiko ko umukiriya we yagirwa umwere ndetse ibyafatiriwe bigasubizwa.

Ubushinjacyaha bwasabye ko Urukiko rutahindura icyemezo rukaba rwahamya Kalisa John ibyaha byo gusakaza amashusho y'urukozasoni no gutangaza amakuru y'urukozasoni hakoreshejwe mudasobwa cyangwa se urusobe rwa mudasobwa. 

Uzabakiriho Cyprien yasoje asaba imbabazi asaba ko bazamugabanyiriza cyangwa se bazamusubikire. Ni ingingo Urukiko rwavuze ko usaba kugabanyirizwa igihano iyo waburanye wemera icyaha. Ubushinjacyaha bwavuze ko batabuza Urukiko gufata umwanzuro ukwiriye.

 Urubanza ruzasomwa ku itariki 19 Gicurasi 2026 saa cyenda.