‎Izi mpapuro zasohotse ku wa 9 Werurwe 2026, zikaba ari icyiciro cya gatatu cyizwi nka ‘Sustainability-Linked Bond (SLB)’, zigamije gukusanya ubushobozi bwo gushyigikira imishinga y’iterambere rirambye.

‎BRD ifite gahunda yo gukomeza gushyira ku isoko izi mpapuro kugeza ku gaciro ka Miliyari 150 Frw bitarenze mu 2028.

‎Ubuyobozi bw’iyi banki bugaragaza ko uburyo izi mpapuro zakiriwe neza ku isoko ari ikimenyetso cy’icyizere abashoramari bafitiye icyerekezo cyayo, ndetse n’ubushobozi imaze kwerekana mu gukusanya igishoro gishyirwa mu mishinga ifite uruhare rukomeye mu kuzamura ubukungu n’imibereho myiza y’Abanyarwanda.

‎BRD isobanura ko iyi ntsinzi yatewe n’ubukangurambaga bwakozwe, gushishikariza abashoramari, no gukoresha ikoranabuhanga rituma kugura izi mpapuro byoroha ku bashoramari b’imbere mu gihugu no mu mahanga, barimo n’Abanyarwanda baba muri Leta Zunze Ubumwe za Amerika, Luxembourg, Denmark, Kenya na Israel.

‎Abaguze izi mpapuro biganjemo ibigo bicunga imisanzu y’ubwiteganyirize, banki z’ubucuruzi, ibigo by’ubwishingizi n’ibindi bigo by’imari.

‎Umuyobozi Mukuru wa BRD, Stella Rusine Nteziryayo, yavuze ko bishimiye icyizere bakomeje kugirirwa n’abashoramari.

‎Ati " Kuba icyiciro cya gatatu cy’izi mpapuro zaguzwe ku kigero kirenze icyari cyitezwe ni ikimenyetso cy’icyizere abashoramari bafitiye ubushobozi bwa BRD mu gutanga umusanzu mu iterambere ry’u Rwanda. Icyo cyizere turagihesha agaciro, kandi tugashyira imbaraga mu kugenzura ko intego z’iterambere zigamije zigerwaho.”

‎Izi mpapuro zizatangira gucuruzwa ku Isoko ry’Imari n’Imigabane ry’u Rwanda ku wa 27 Mata 2026.

‎Amafaranga yakusanyijwe azifashishwa mu gushyigikira gahunda zitandukanye zirimo guteza imbere ubucuruzi, kongera amahirwe yo kubona serivisi z’imari, ndetse no kubaka amacumbi mu bice bitandukanye by’igihugu.

‎Mu 2023, BRD yabaye banki ya mbere y’iterambere mu Rwanda ishyize ku isoko impapuro mpeshamwenda zo muri iki cyiciro, aho izifite agaciro ka miliyari 30 Frw zaguzwe ku kigero cya 110%.

‎Mu 2024, hasohotse icyiciro cya kabiri cyaguzwe ku kigero cya 130%, maze hakusanywa miliyari 33 Frw.