Abafashwe ni abo mu turere twa Burera na Gicumbi aho bageragezaga kwambutsa ibyo bishyimbo babijyana mu gihugu cy’igituranyi.

Polisi ivuga ko  abo bantu babyambutsaga bagerageje kwambutsa toni 40 bazinyujije mu nzira zitemewe zizwi nka panya gusa ngo bagiye bafatwa mu bihe bitandukanye.

Umuvugizi wa Polisi y’u Rwanda mu Ntara y’Amajyaruguru, SP Jean Bosco Mwiseneza yavuze ko “ Ibyinshi mu byo bafatanwe, bagiye babikura mu Ntara y’Iburasirazuba, bakabitunda n’imodoka zabijyanaga muri utwo Turere, bakabibika mu ma depo ya bamwe mu bacuruzi begereye imipaka”.

Yakomeje avuga ko  “Mu makuru y’ibanze tumaze gukusanya, ni uko ababirangurira kuri izo depo bagendaga bakuraho bike bike, bakabiha ababitunda ku mutwe, bakabinyuza mu nzira zitemewe, bakajya kubigurisha mu bihugu by’abaturanyi”.

Mu bikorwa byo gutahura abo bantu, hafatiwemo ibishyimbo by’ubwoko butandukanye burimo ibyitwa Rutuku, Injyamani n’ibyo abaturage bakunze kwita Colta. Ibimaze gufatwa uhereye muri Mutarama kugeza muri Werurwe 2025, bipma Toni 40 n’ibiro 321.

Amakuru avuga ko ababyambutsa ngo baba bakurikiyeyo igiciro babigurishaho kiri hejuru, ugereranyije n’iby’aho baba babivanye; nyamara ngo ibi ni ukwibeshya gukomeye nk’uko SP Mwiseneza yakomeje abivuga.

Yasabye abajya bakora ibi byaha kubireka kuko usanga biteza igihombo imiryango yabo ugasanga bahora mu makimbirane.