Ibi byagaragajwe mu nama yahuje ubuyobozi bwa politiki bwa AFC/M23 n’intumwa za PAM zari ziyobowe n’uhagarariye iri shami, David Stevenson, ari kumwe n’abakozi batatu bakorana.

Iyi nama yabereye ku biro by’ubuyobozi bwa AFC/M23, aho impande zombi zaganiriye ku buryo ibikorwa by’ubutabazi bikomeje gukorwa mu duce twa Kivu y’Amajyaruguru na Kivu y’Amajyepfo bigenzurwa n’uyu mutwe.

Abahagarariye PAM bagaragaje aho gahunda zabo zigeze zishyirwa mu bikorwa muri utu duce, zirimo gahunda yo gutanga ibiribwa ku baturage, gahunda ya “Chakula Sokoni” ifasha imiryango kubona ibiribwa binyuze ku masoko yo mu gace batuyemo, ndetse na gahunda yo kugaburira abanyeshuri ku mashuri, bavuga ko yagize uruhare mu kugabanya abana bata ishuri no kuzahura ubukungu bw’aho ibikorwa bikorerwa.

PAM yanagarutse ku mbogamizi abaturage bagihura na zo, zirimo ikibazo cy’ifungwa ry’amabanki mu bice bimwe na bimwe, cyatumye imiryango myinshi ibura uburyo bwo kubona amafaranga yayo, bikarushaho kongera ibibazo by’imibereho.

Mu gusubiza, AFC/M23 yavuze ko yiteguye gukomeza gufasha ibikorwa byose by’ubutabazi bifite intego yo kugabanya imibabaro y’abaturage no gusubiza ubuzima mu buryo busanzwe mu duce igenzura.

Hanaganiriwe ku kibazo cyo kongera gufungura ikibuga cy’indege, impande zombi zemeza ko ari ingenzi mu koroshya ibikorwa by’ubutabazi, ubucuruzi n’imibereho y’abaturage. Bavuze ko ibiganiro kuri iki kibazo bizakomeza mu minsi iri imbere.

Iyi nama yasojwe impande zombi zishimangiye ubushake bwo gukomeza ubufatanye hagati ya PAM n’ubuyobozi bwa AFC/M23, hagamijwe guteza imbere ibikorwa by’imibereho myiza n’iterambere ry’abaturage bo muri ibyo bice.