Imishinga migari yatangiye gukorerwa ku biyaga biri mu karere ka Ngoma, by'umwihariko ku kiyaga cya Mugesera, abaturage bahawemo akazi ndetse n'abahinzi, bavuga ko ubuzima bwabo bwahindutse kubera iyo mishinga.

Imwe mu mishinga irimo gukorerwa ku kiyaga cya Mugesera, harimo umushinga w'ubworozi bw'amafi bukorerwa mu bigega mu Murenge wa Rukumberi, hari hoteli irimo kubakwa mu Murenge wa Zaza izatwara arenga miriyoni eshanu z'amadorari y'Amerika. Undi mushinga ni uruganda rwumisha inanasi zijyanwa mu bihugu birimo Pologne uri mu Murenge wa Mugesera.

Urubyiruko rwo mu Murenge wa Rukumberi, rukora mu mushinga w'ubworozi bw'amafi bukorerwa mu nkengero z'ikiyaga cya Mugesera, ruvuga ko amafaranga bahembwa abafasha gukemura ibibazo byabo ndetse bakaba baratangiye gukora Imishinga y'ubworozi bw'amatungo magufi mu rwego rwo guhindura imibereho yabo.

Umwe mu rubyiruko rwaganiriye na UKWELITIMES, rwahawe akazi na rwiyemezamirimo ukora ubworozi bw'amafi, avuga ko akazi bahawe kabaye imbarutso yo kwiteza imbere.

Yagize ati " Kuva dutangiye gukora hano twageze kuri byinshi nko gukemura ibibazo twahuraga nabyo, ubu nkanjye natangiye korora ingurube kandi hari n'indi mishinga nteganya gukora kugira ngo nzagere ku iterambere."

Umwe mu baturage bahawe akazi mu ruganda rwubatse mu nkengero z'ikiyaga cya Mugesera mu Murenge wa Mugesera Ikuzwe Fiacre, avuga ko nyuma yo gutangira gukora mu ruganda nawe amaze kugera ku iterambere.

Yagize ati" Mbere ntaratangira akazi muri uru ruganda navomeraga abaturage amazi, ariko maze gutangira akazi hano, umugore wanjye yari yaracikishirije amashuri ariko ubu yasubiye mu ishuri ariga, ubu nabonye perimi A na B. Ibindi nagezeho ni byinshi kandi twateye imbere ndetse n'abatuye muri uyu Murenge uru ruganda rwabateje imbere kuko abahinzi babonye isoko ry'umusaruro wabo mbere warangirikaga kubera kubura  isoko."

Rwiyemezamirimo wubatse uruganda rwumisha inanasi zijyanwa mu mahanga, Shema Yvan, avuga ko uruganda rwe rwahaye akazi abaturage ndetse agura umusaruro w'abahinzi b'inanasi bo mu karere ka Ngoma. Abahinzi bakorana n'uwo mushoramari barenga 120 ndetse avuga ko hari indi mishinga ateganya kongera mu bikorwa bye nayo izatanga imirimo ku baturage.

Shema agaragaza ko uruganda rwe rwatanze akazi ku baturage batuye mu karere ka Ngoma biganjemo urubyiruko ndetse agaragaza ko hari indi mishinga afite izaha abaturage akazi. Yagize ati "Dufite abantu dukorana umunsi ku munsi 37, hari igihe dukoresha abakozi 85 mu bakozi mfite 80% ni urubyiruko, hari Ibindi bikorwa duteganya kongeramo, ubu tugiye no gutangira gukora amavuta muri avoka. Tugiye gutangira undi mushinga w'ubukerarugendo bushingiye ku buhinzi."

Umuyobozi w'Akarere ka Ngoma, Niyonagira Nathalie, avuga ko ibikorwa by'ishoramari biri ku biyaga byo muri aka karere, byitezweho guhindura imibereho y'abaturage kuko bamwe babonyemo akazi abandi bakaba barabonye isoko ry'umusaruro wabo.

Meya Niyonagira, avuga ko abaturage batangiye kubyaza umusaruro amahirwe bazaniwe n'abashoramari batangiye gukorera imishinga yabo ku kiyaga cya Mugesera. Mu kiganiro yagiranye n'itangazamakuru ku wa 31 Ukuboza 2025, yavuze ko Akarere ka Ngoma, katangiye korohereza abashoramari bafite ibikorwa ku biyaga biri muri ako karere.

Yagize ati" Hafi y'ibiyaga hari abashoramari bahaguze ubutaka, hari hakiri imbogamizi zo kuhageza ibikorwa remezo, uyu munsi ibyari biteye impungenge harimo amashanyarazi, ariko dufite umushinga uyajyana hafi y'ahari ibyo bikorwa. Umuntu ushora imari atagira amashanyarazi biba ari ikibazo, uyu mwaka uzagera hagati amashanyarazi yageze mu mirenge yose yegereye ibyo biyaga."

Ubuyobozi bw'Akarere ka Ngoma, buvuga ko igishushanyo mbonera cy' ahazakorerwa ibikorwa birimo ibijyanye n' ubugerarugendo cyamaze gukorwa.