Ibikorwa Ibi bikorwa bifite insanganyamatsiko igira iti “Ubufatanye bw’Abaturage, Ingabo na Polisi by’u Rwanda mu bikorwa byo kwizihiza Kwibohora32.” byatangijwe hirya no hino mu gihugu kuri uyu wa Mbere tariki 09 Werurwe 2026. Minisitiri w’Umutekano mu Gihugu, Dr. Vincent Biruta.

Ni bikorwa byatangijwe ndetse binayoborwa na bamwe mu bagize Guverinoma n'Umugaba Mukuru w’ingabo z’u Rwanda (RDF), Gen. Mubarakh Muganga n’Umuyobozi Mukuru wa Polisi y’u Rwanda (RNP), CG Felix Namuhoranye.

Biteganyijwe ko Ingabo z’u Rwanda na Polisi y’Igihugu bizafatanya n’abaturage kububakira ibikorwa remezo bitandukanye, mu rwego rwo kwizihiza ku nshuro ya 32 Umunsi wo Kwibohora.

Minisitiri w’Umutekano mu Gihugu, Dr. Vincent Biruta, yabwiye abaturage bo mu mu Murenge wa Rwempasha, Akarere ka Nyagatare, ko ibikorwa bihuriweho n’Ingabo na Polisi y’Igihugu bigamije guteza imbere imibereho n’iterambere by’abaturage.

Yagaragaje ko bikazibanda ku buvuzi, kubungabunga ibidukikije, kubaka ibikorwa remezo, kubaka amashuri n’amarerero, ubworozi, kubakira imiryango itishoboye no kuremera amakoperative.

Minisitiri Dr. Biruta yavuze ko iyi gahunda ari igihamya cy’ubwitange n’ubushake bwo gukomeza guteza imbere umutekano, imibereho myiza y’abaturage no kwihutisha iterambere ry’igihugu.

Minisitiri w’Ingabo Juvenal Marizamunda, ubwo yatangizaga ku mugaragaro ibikorwa by’Ingabo z’Igihugu na Polisi y’u Rwanda byo kubaka ibyumba by’amashuri 10, inyubako z’ubuyobozi na laboratwari ku Ishuri rya Kigese Technical Secondary School mu Murenge wa Rugalika, Akarere ka Kamonyi mu Ntara y’Amajyepfo. Yavuze ko iyi gahunda ihuza Inzego z’umutekano, abayobozi b’Inzego z’ibanze n’abaturage, hagamijwe gushimangira ubufatanye hagati y’abaturage n’inzego za Leta.

Yashimangiye ko umutekano n’iterambere bijyana, kandi ko umutekano urambye udashoboka hatabayeho uruhare rugaragara rw’abaturage.

Minisitiri w’Uburezi, Joseph Nsengimana, ari kumwe n’Umuyobozi Mukuru wungirije wa Polisi y’u Rwanda (DIGP) ushinzwe ubutegetsi n’abakozi, DCG Jeanne Chantal Ujeneza, bo bashyize ibuye ry’ifatizo ahazubakwa ibyumba by’amashuri 15 mu Rwunge rw’Amashuri rwa Rwankuba mu Murenge wa Kinyinya mu Karere ka Nyarugenge mu Mujyi wa Kigali.

Nsengimana yavuze ko iki gikorwa ari intambwe ikomeye mu guteza imbere ireme ry’uburezi, kandi ko ibi byumba bizafasha abanyeshuri kwiga neza ndetse n’abarezi bagatanga uburezi bufite ireme.

Umugaba Mukuru w’Ingabo z’u Rwanda Gen. Mubarakh Muganga, yashishikarije abaturage bo mu Karere ka Gatsibo mu Murenge wa Ngarama mu Ntara y’Iburasirazuba kugira uruhare rugaragara mu bikorwa byo kubungabunga ibidukikije no guteza imbere igihugu.

Umuyobozi Mukuru wa Polisi y’u Rwanda CG Felix Namuhoranye n’Umuyobozi w’Ingabo wa Division ya Gatatu, Maj Gen Eugène Nkubito, bashyize ibuye ry’ifatizo ahagiye kubakwa inzu 30 z’imiryango itishoboye mu Murenge wa Bigogwe mu Karere ka Nyabihu.

CG Namuhoranye, nawe yashimiye abaturage kubera ubufatanye bwabo bukomeye n’inzego z’umutekano mu gukomeza kubungabunga umutekano mu gihugu.

Mu 2025 hakozwe ibikorwa by’Ingabo z’igihugu na Polisi y’u Rwanda bitandukanye kuko abaturage barenga ibihumbi 30 bahawe serivisi z’ubuvuzi ku ndwara zitandukanye, hubatse inzu 70 zahawe abatishoboye, ibiraro 13 ndetse ibyumba by’amashuri y’incuke 10 n’ibindi.