Kinyarwanda
English
Swahili
Nyamasheke: Abantu batanu bafunzwe bazira kwiba ibiribwa by’abanyeshuri
Abantu batanu bo mu Karere ka Nyamasheke barimo abatetsi babiri, abanyonzi babiri n’umucuruzi batawe muri yombi, bakekwaho kunyereza kawunga yatanzwe muri gahunda yo kugaburira abanyeshuri ku mashuri ‘school feeding’.
Ibi byabereye mu Mudugudu wa Gasumo, Akagari ka Impala, Umurenge wa Bushenge ku wa 04 Ugushyingo 2025.
Saa Cyenda nibwo abaturage babonye abanyonzi batwaye kawunga itandukanye n’iyo basanzwe bacuruza muri ako gace, bababajije bavuga ko bayikuye ku ishuri ribanza rya Nyarutovu.
Abo banyonzi buri wese yari atwaye ibilo 25 bya kawunga bavuze ko bayishyiriye umucuruzi witwa Iraboneye Jeanne ucururiza mu isantere ya Mugera.
Abatetsi bo kuri iryo shuri, bemeye ko ari inshuro ya Gatatu bari bagurishije ibiribwa by’abanyeshuri, bavuga ko banusura ku biribwa bahawe byo guteka, bagakuraho bike bike kugeza bagize ibilo 25 mu gihe umucuruzi bari babishyiriye wari wamaze kubishyura 30000 Frw, we yavuze ko ari ubwa mbere abaguriye.
Umunyamabanga Nshingwabikorwa w’Umurenge wa Bushenge, Habumugisha Hyacinthe, yavuze ko abafashwe bafungiye kuri RIB Sitasiyo ya Shangi mu gihe iperereza rikomeje.
Ati “Ubutumwa dutanga ni uko abantu bakwiye kuzamura no gukomeza umuco w’ubunyangamugayo. Ubuyobozi bw’ibigo by’amashuri, abakozi, abagize komite y’imicungire ya school feeding bose turabasaba gukorera mu mucyo kugira ngo abana bacu, abanyeshuri babashe kurya ifunguro rifatirwa ku ishuri uko bikwiye”.
Yakomeje avuga ko nk’ubuyobozi bw’inzego z’ibanze bagiye kurushaho gukaza ubugenzuzi bwo kureba ko amafishi y’ibiribwa byinjiye n’ibyasohotse yuzuzwa neza mu kwirinda ko hari ibiribwa bigenewe abanyeshuri byakomeza kunyuzwa ku ruhande.
Urwego rw’Igihugu rw’Ubugenzacyaha (RIB), ruherutse gutangaza ko mu myaka itatu hanyerejwe ibikoresho by’ibigo by’amashuri birimo n’ibiribwa by’arenga miliyoni 190 Frw, aho ibiribwa byihariye 14% kuko hanyerejwe ibiribwa by’arenga miliyoni 20Frw.
