Mu ijoro ryacyeye tariki 8 Mutarama 2026, nibwo ikipe ya Arsenal FC yakinnye na Liverpool FC mu mukino w'umunsi wa 21 wa Shampiyona y'u Bwongereza. Ni umukino ikipe ya Arsenal FC yaje gukina ibizi neza ko ikipe ya Manchester City bahanganiye igikombe yatakaje amanota abiri imbere ya Brighton and Hove Albion ariko gutsinda birayinanira.

Uyu mukino twabonye ikipe ya Liverpool FC iri ku rwego rwo hejuru nyuma yaho benshi baherezaga amahirwe ikipe ya Arsenal FC bijyanye nuko yari imaze iminsi irimo kwitwara ariko kandi ikaba yari no kuri Sitade yayo, Emirates. Uyu mukino waje kurangira ikipe zombi zinganyije ubusa ku busa nubwo ikipe zombi zahushije uburyo bwabaga bukomeye.

Arsenal FC nyuma yo kunganya yahise ikomeza kurusha Manchester City amanota 6. Arsenal FC ifite amanota 49 iri ku mwanya wa mbere mu gihe Manchester City ifite amanota 43 iri ku mwanya wa kabiri.

Real Madrid yongeye kwishora ku mukino wa nyuma wa Super Cup 

Mu gihugu cya Arabia Saudite, ikipe ya Real Madrid yakinnye na Atletico Madrid mu mukino wa 1/2 cya Super Cup ya Espagne. Ni umukino wagoye cyane ikipe ya Real Madrid kuko itari ifite Kylian Mbappé ariko ikaba yakinaga na Atletico Madrid isanzwe iyigora cyane.

Umukino hagati y'aya makipe yombi warangiye ikipe ya Real Madrid itsinze ibitego 2-1 bituma Real Madrid ikatisha itike yo gukina umukino wa nyuma. Ikipe ya Real Madrid yatsindiwe na Rodrygo Goes ndetse na Fede Valverde. Mu gihe ikipe ya Atletico Madrid yatsindiwe na Alexander Sørloth.

Real Madrid nyuma yo gutsinda Atletico Madrid, yasanze ku mukino wa nyuma FC Barcelona iheruka gutsinda Athletic Club ibitego 5-0. Real Madrid yakinnye idafite Kylian Mbappé, yahise imutumizaho igitaraganya kugira ngo aze atangira kwitegura uyu mukino nyuma y'imvune yari amaranye iminsi.

Uyu mukino wa nyuma hagati ya Real Madrid na FC Barcelona uzaba ku munsi wo ku cyumweru tariki 11 Mutarama 2026. Ni umukino uzatangira ku isaha ya Saa Tatu z'ijoro muri Arabia Saudite. Umukino wa nyuma umwaka ushize, Real Madrid yatsinzwe na FC Barcelona ibitego 3-2 bituma yegukana igikombe.

Real Madrid yatsinze ikipe ya Atletico Madrid muri 1/2 cya Super Cup ya Espagne 

Arsenal FC yanganyije na Liverpool FC ubusa ku busa