Urukiko rw'Ibanze rwa Gasabo rwasomye umwanzuro w’urubanza Ubushinjacyaha buregamo Bishop Harerimana Jean Bosco,umushumba wa Zeraphat Holy Church. 

Yakatiwe imyaka ine isubikiye mu myaka ibiri. Harerimana Jean Bosco yahamijwe ibyaha bibiri;icyaha cy'ubuhemu n'icyaha cyo kugurisha ikintu cy'undi cyangwa kugitangaho ingwate. Ikindi kandi yaciwe ihazabu ya miliyoni 1 Frw n'indishyi ya miliyoni 2,5 Frw. 

Ni mu gihe Nyiratuza Rudacogora Monique yari yareze asaba indishyi za miliyoni zisaga 400 Frw. Urukiko kandi rwategetse Bishop Harerimana Jean Bosco gutanga miliyoni 24 Frw z'imodoka agomba gusubiza Nyiratuza Rudacogora Monique uzwi nka 'Grand Mère' mu itorero.

Ku itariki 23 Mata 2026 I nibwo umwanzuro wasomwe. Urukiko rwavuze ko Harerimana Jean Bosco adahamwa n'icyaha cy'ubuhemu ku bibanza birimo ikiri I Gasogi mu mujyi wa Kigali ndetse n'icyubatsemo itorero rya Zeraphat Holy Church I Rubavu kuko cyanditse kuri iryo torero.

Urukiko rwavuze ko ahamwa n'icyaha cyo kugurisha ikintu cy’undi cyangwa kugitangaho ingwate ku bibanza bibiri I Rubavu. Urukiko rwategetse ko Harerimana Jean Bosco yishyura 10,000 Frw y'igarama y'urubanza.

Uko 'Grand Mère' yizeye Bishop Harerimana Jean Bosco akamutenguha

Byatangiye Nyiratuza Rudacogora Monique yizera cyane Harerimana Jean Bosco. Agura ahubatswe itorero I Rubavu. Yakomeje kumuba hafi amugurira n'imodoka yagendagamo.

Barakomeje barakorana mu cyizere akajya amwoherereza amafaranga ngo amugurire imitungo irimo ibibanza. 

Aho kwandika bya bibanza kuri Nyiratuza Rudacogora Monique yabyiyandikagaho ibindi akabyandika ku itorero. Itorero I Rubavu ryaje gukura bigira inama yo kuryagurira I Kigali. 

Mu kuryagurira I Kigali rero haguzwe ikibanza I Gasogi ari nacyo Urukiko rwavuze ko kizakomeza kizakomeza kuba icya Bishop Harerimana Jean Bosco.

Mu nkiko afitemo urundi rubanza dore ku itariki 14 Gicurasi 2026 saa cyenda ku rukiko rw'Ibanze rwa Kicukiro azasomerwa urubanza rw'inshinjabyaha ku byaha byo kwihesha ikintu cy'undi hakoreshejwe uburiganya, gukangisha gusebanya gukurikiranywe umugore we. 

Muri uru rubanza Ubushinjacyaha bwamusabiye igifungo cy'imyaka irindwi naho umugore we yasabiwe gufungwa imyaka itatu.