Inkuru itangazwa n'ikinyamakuru New York Post, ivuga ko uyu mugabo witwa Mohammed Baqer Saad Dawood Al-Saadi yafatiwe muri Turukiya tariki ya 15 Gicurasi 2026 mbere yo koherezwa muri Amerika kugira ngo akurikiranweho ibyaha by'iterabwoba. 

Amakuru avuga ko uyu mugambi wari ugamije kwihorera nyuma y’urupfu rwa Qasem Soleimani, wahoze ayobora umutwe wa Quds Force wa Iran, wishwe mu gitero cya drone cyategetswe na Perezida Donald Trump mu mwaka wa 2020 i Baghdad muri Iraq.

Bimwe mu byatangajwe n’inzego z’umutekano bivuga ko Al-Saadi yari afite amakuru arimo n’inyubako y’urugo rwa Ivanka Trump muri Florida ndetse ko yigeze gutangaza amagambo y’ubushotoranyi ku mbuga nkoranyambaga ku muryango wa Trump.

Ibindi bitangazamakuru birimo The Telegraph na Iran International nabyo byemeje aya makuru bivuga ko uyu mugambi ushobora kuba ufitanye isano n’imitwe ishyigikiwe na Iran ikomeje gushaka uburyo bwo kwihorera ku bayobozi b'Amerika bagize uruhare mu rupfu rwa Soleiman.

Hakomeje gukekwa ko Al-Saadi yaba afitanye isano n'umutwe w'iterabwoba uzwi kw'izina rya Kata’ib Hezbollah ndetse akekwaho kugira uruhare mu bitero byibasiye ibikorwa by'Amerika n'Abayahudi mu Burayi no muri Amerika ya Ruguru.

Al-Saadi avugana na Qasem Soleimani wishwe n'igitero cya Drone cyategetwe na Trump