Tariki 12 Werurwe 2025, ikipe ya Real Madrid yakinnye umukino wo kwishyura wa UEFA Champions league n'ikipe ya Atletico Madrid, uza kurangira ikipe ya Real Madrid ari yo ikomeje muri 1/4 kuri Penalite 4-2.

Abakinnyi barimo Kylian Mbappe, Antonio Rudiger, Dani Cebalos ndetse na Vinicius Jr, bishimiye uku gukomeza mu buryo bunnyega abakunzi ba Atletico Madrid ndetse iyi kipe iza guhita ibarega muri UEFA kugirango bahanwe kuko ibyo bakoze ntabwo byari bishimishije ku bakunzi ba Atletico Madrid.

Ntabwo ibirego byari bimwe kuri aba bakinnyi bose ariko uwibanzweho cyane na Antonio Rudiger ku buryo byashyirwaga mu majwi ko ashobora kudakina umukino Real Madrid izakinamo na Arsenal FC tariki 8 Mata 2025, mu cyumweru gitaha.

Kuri uyu wa Gatanu tariki 4 Mata 2025, Ishyirahamwe ry'umupira w'amagaru ku mugabane w'i burayi (UEFA), yaje guhereza ibihano aba bakinnyi bagera kuri 4 ariko bidafite kinini biteye ku ikipe ya Real Madrid yari ifite ubwoba bwo gukina itabafite.

Ibi bihano aba bakinnyi bahawe, Antonio Rudiger yaciwe amande angana n'ibihumbi 40 by'amayero ariko ahabwa gusiba umukino umwe usubitswe mu gihe cy'umwaka. Kylian Mbape yaciwe ibihumbi 30 by'amayero nawe ahabwa gusiba umukino 1 usubitswe mu gihe cy'umwaka, ibi bivuze ko ibi bihano bizahabwa agaciro mu bihe biri imbere.

Daniel Cebalos we yaje gucibwa amande angana n'ibihumbi 20 by'amayero ariko ntiyahabwa gusiba umukino n'umwe. Vinicius Jr mu igenzurwa ryakozwe basanze nta kintu yakoze gihohotera abakunzi ba Atletico Madrid ndetse ntiyahawe igihano na kimwe, bivuze ko yagizwe umwere.

Umukino ubanza wa 1/4 cya UEFA Champions Leagu, ikipe ya Real Madrid irawukina mu cyumweru gitaha n'ikipe ya Arsenal FC. Uyu mukino uteganyijwe ku i tariki 8 Mata 2025, Real Madrid izabanza kujya mu bwongereza kuri Emirates Stadium.

Antonio Rudiger azakina umukino Real Madrid izakinamo na Arsenal FC