Ambasade ya Leta Zunze Ubumwe za Amerika muri Tanzania, yashyize hanze itangazo risaba abaturage bayo bari muri Tanzania kwigengesera kuko ku wa 09 Ukuboza 2025, iki gihugu gishobora kwibasirwa n’imyigaragambyo ikomeye.

Iri tangazo ryashyizwe hanze mu gitondo cyo ku wa Mbere tariki 01 Ukuboza 2025 rivuga ko “Hari imyigaragambyo ikomeje gutegurwa y’abatavuga rumwe na Guverinoma ku wa 09 Ukuboza 2025, gusa ibikorwa by’imyigaragambyo bishobora gutangira mbere, ku wa 05 Ukuboza 2025.”

Muri iryo tangazo rero bagaragaza ko amatora yo ku wa 29 Ukwakira 2025 yasize habayeho imyigaragambyo yangije ibikorwaremezo, itwara ubuzima bw'abasivile, murandasi ikirwaho mu gihe cy'iminsi itandatu.

Ubwoba ni bwinshi ko abakora ingendo bashohora guhagarara ,murandasi igakurwaho, ndetse hagashyirwaho amasaha yo gukora imikwabo. Iyi ambasade yabujije abaturage bayo gukora ingendo zitari ngombwa, kwirinda kujya mu myigaragambyo.

Umunyamerika wese uri ku butaka bwa Tanzania yasabwe kubika ibiryo,ibikomoka kuri peteroli, imiti n'amafaranga yo gukoresha mu bihe by'amakuba.