Hashize iminsi ku mugabane w'iburayi amakipe atangiye gusinyisha abakinnyi ndetse andi atangira kugirana ibiganiro n'abo yifuza kongeramo muri iyi meshyi.

Ikipe ya Real Madrid niyo isa nk'iyerekana imbaraga nyinshi muri iri soko ryo kugura no kugurisha abakinnyi kuko urebye iri mu makipe yamaze kurangizanya n'umukinnyi wa mbere witwa Dean Huijsen.

Ikipe ya Real Madrid yemeranyije na AFC Bournemouth kwishyura amafaranga angana na Milliyoni 50 z'amayero ariko aya mafaranga na Juventus yo mu gihugu cy'ubutaliyani izayaryaho.

Ubwo AFC Bournemouth yaguraga uyu myugariro, mu masezerano yagiranye na Juventus harimo ikintu kivuga ko ikipe izajya imugura izajya ifataho 15% bivuze ko ubwo yerekeje muri Real Madrid, Juventus izafataho Million zitari munsi 9.

Ku wa Kane tariki 15 Gicurasi 2025, ikipe ya FC Barcelona yatwaye igikombe cya Shampiyona ya Esipanye, nyuma yo gutsinda Espanyol ibitego 2-0.

Ku munsi wejo hashize tariki 16 Gicurasi 2025, abakinnyi, abafana ba FC Barcelona bakoze akarasisi mu ntara ya Catalonia bishimira iki gikombe cya 28 batwaye muri shampiyona. Abafana barenga ibihumbi 670 bari mu muhanda bishimira iki gikombe ndetse baririmba indirimbo z'iyi kipe babyina cyane.

Ikindi kirimo kugarukwaho cyane muri iki gitondo, ni ibiganiro bya Rodrygo Goes na Arsenal FC nyuma yo kumenyesha Real Madrid ko adashaka gukomezanya na yo.

Nkuko bitangazwa na British Media, ivuga ko ikipe ya Arsenal FC nyuma yo kubona ko ikeneye umukinnyi w'umuhanga ukina aca ku ruhande, yerekeje amaso kuri rutahizamu wa Real Madrid, Rodrygo Goes wifuza gutandukana n'iyi kipe.

Ikipe ya Arsenal FC kugeza ubu bisa nibyamaze kurangira Kandi hagati yayo na rutahizamu Gyokores kuko bivugwa ko ibiganiro bigeze kure ndetse vuba ashoboro gusinya amasezerano.

Urugamba rwo guhatanira kuza mu myanya 4 yemerera ikipe kuzakina imikino ya UEFA Champions league muri shampiyona y'ubwongereza igeze ahashyushye.

Mu ijoro rya Cyeye ikipe ya Chelsea FC yatsinze Manchester United igitego 1-0. Uyu mukino ikipe ya Chelsea FC yakoze ibyo yasabwaga kuko gutsinda byatumye irara ku mwanya wa 4 n'amanota 66. 

Indi kipe yasabwaga gutsinda ni Aston Villa yatsinze ikipe ya Tottenham Hotspur ibitego 2-0 bituma ihita nayo igira amanota 66, byahise bizamura ubukana muri iri hangana kuko kuva ku ikipe ya 2 kugeza kuya 7 zose zifite amahirwe muri iyi mikino 2 isigaye kugirango shampiyona irangire.

Iyi shampiyona y'ubwongereza irakomeza muri iyi wikendi ndetse haranakinwa umukino wa nyuma wa FA Cup ugomba guhuza Manchester City na Crystal Palace zageze ku mukino wa nyuma.

Rodrygo Goes arashakwa na Arsenal FC 

Dean Huijsen yamaze kurangizanya na Real Madrid 

Abarenga ibihumbi 670 baje kwifatanya na FC Barcelona kwishima igikombe cya shampiyona.