Mu ijoro ryacyeye tariki 28 Ukwakira 2025, nibwo Al Nassr ya Cristiano Ronaldo yakinnye umukino na Al Ittihad wa King's Cup cyangwa igikombe cy'Umwami mu gihugu cya Saudi Arabia.

Ni umukino waje kurangira Al Nassr isezerewe na Al Ittihad ikinamo Karim Benzema wakinanye na Cristiano Ronaldo muri Real Madrid. Ni umukino warangiye ikipe ya Al Ittihad itsinze ibitego 2-1 harimo n'igitego cya Karim Benzema.

Cristiano Ronaldo ntabwo birimo kugenda neza muri Al Nassr nyuma yo kuyerekezamo mu mwaka wa 2023 avuye muri Manchester United. Ronaldo mu marushanwa 13 yose akinnye muri Al Nassr ntabwo yabashije kugira icyo akora kuko hose yarasezerewe.

Uyu munya-Portugal, Cristiano Ronaldo, igikombe kimwe gusa yahesheje Al Nassr ni igikombe yatwaye akigera muri iyi kipe mu mwaka wa 2023 gihuza amakipe abarizwa muri Leta zunze ubumwe z'Abarabu, Arab Club Champions Cup ariko kuva icyo gihe ntakindi aratwarana n'iyi kipe.

Cristiano Ronaldo akomeje urugendo rwo gushaka ibitego 1000 akaba umukinnyi wa mbere wujuje ibi bitego. Uyu mukinnyi amaze gutsinda ibitego 106 mu mikino 120 amaze gukina kuva yagera muri Al Nassr bituma yuzuza ibitego 950 amaze gutsinda kuva yatangira gukina nk'uwabigize umwuga.

Cristiano Ronaldo gutwarana ikindi gikombe na Al Nassr bikomeje kumugora