Ni umukino wabaye kuri uyu wa Gatatu tariki 3 Kanama 2025, ubera kuri Sitade KMC. CECAFA Kagame Cup yongeye kubera mu gihugu cya Tanzania ariko APR FC itangira yitwara neza mu buryo bwemeza.

Ku munota wa 7 gusa APR FC yari yamaze gutsinda igitego cya mbere cyatsinzwe n'umunya-Burkina Faso witwa Cheick Djibril Ouattara. Ni umupira muremure yahawe atanga umuzamu wa Bumamuru FC ahita atereka mu izamu n'ukuguru kw'iburyo.

APR FC yakomeje kugenda yataka mu buryo bwose nubwo Bumamuru FC nayo yanyuzagamo ikataka mu buryo bukomeye cyane ariko igice cya mbere kiza kurangira APR FC itsinze igitego kimwe ku busa.

Mu gice cya Kabiri APR FC yatangiye yataka cyane ndetse ku munota wa 73 yaje guhita itsinda igitego cya Kabiri gitsinzwe na William Mel Togui. Ni umupira wahererekanwe n'abarimo Ruboneka Jean Bosco ugeze kuri Memel Raouf Dao ahereza neza Togui ahita atereka mu izamu.

Abakinnyi barimo Ruboneka Jean Bosco, Dauda Yusif, Djibril Ouattara, Hakim Kiwanuka, Memel Dao, William Togui baje kuva mu kibuga hinjiramo Ramadhan, Pacifique, Lamine Bah, Suane, Hadji na Eric.

Ibitego byishimiwe cyane n'abakunzi ndetse n'abakinnyi ba APR FC kuko ba rutahizamu bayo 2 batsinze ibitego Kandi mu mukino wa mbere muri iri rushanwa riterwa inkunga na Perezida w'u Rwanda, Paul Kagame.

Nyuma y'uyu mukino umukinnyi wa APR FC, Memel Raouf Dao yaje guhabwa igihembo cy'umukinnyi witwaye neza muri uyu mukino nyuma yo gutsinda imipira yavuyemo ibitego ariko akanitwara neza mu mikinire y'ikipe.

Memel Dao yatowe nk'umukinnyi w'umukino, yahawe ibihumbi 500 by'Amashiringi ubwo ni arenga ibihumbi 200 bw'amafaranga y'u Rwanda.

APR FC izakomeza kuri uyu wa Gatandatu tariki 6 Nzeri 2025. Kuri uyu munsi izakina na Mlandege FC ku isaha ya saa cyenda z'amanwa kuri sitade yitwa Mj Gen. Isamuhyo.

Memel Raouf Dao yahawe igihembo cy'umukinnyi mwiza mu mukino