Kinyarwanda
English
Swahili
“Twaketse ko ryari iherezo ry’isi”: Ibi ni byo abatuye mu mujyi wa Israel bavuga nyuma y’igitero gikomeye cya Iran
Mu kanya gato mbere y’uko amasezerano yo guhagarika imirwano atangira gushyirwa mu bikorwa hagati ya Iran na Israel, abatuye mu mujyi wa Beersheba uherereye mu majyepfo ya Israel bazinduwe n’amajwi y'intabaza avugira kuri telefone zabo ababurira igitero cy’ibisasu bya misile.
"Ubutumwa bukomeye bwo kuburira", ni bwo butumwa bwari buri kuri telefone zabo, bubamenyesha ko hari igitero cyari kigiye kuba. Hashize akanya gato, intabaza zitangira kuvuga mu mihanda.
Merav Manay n’umuryango we, kimwe n’abandi benshi, bahise birukira mu cyumba cyagenewe guhungirwamo mu gihe cy’ibitero — ni icyumba cyubakishijwe sima ikomeye, gifite urugi rukomeye rw’icyuma, rwubatswe hagamijwe kurinda abari imbere yacyo ibitero bya misile.
Igihe igisasu cya misile cyaturikaga, bumvise inzu yose inyeganyeze nk’aho igiye gusenyuka, bahita bafatanya amaboko.
Uyu mugore yagize ati: "Cyari gikomeye cyane ku buryo twibajije ko isi igiye kurangira."
Igihe bagarukaga mu cyumba cy’imbere, basanze ibirahuri by’amadirishya byaramenetse bikaba ibice binyanyagiye hose kubera igisasu, ariko nta n’umwe wagize icyo aba.
Merav yatinze gusohoka muri iyo nzu amasaha menshi, afite ubwoba bw'ibyo ashobora gusanga hanze.
Hanze gato y’inzu yabo, indi nzu isa n’iyo yabo yo yari yakubiswe n’igisasu cyayisenye igice kinini.
Abantu bane bahasize ubuzima.
Umuvugizi w’igisirikare cya Israel gishinzwe kurinda abasivile (Home Front Command) mu majyepfo y’igihugu yabwiye BBC ko nabo bari bihishe mu cyumba cyagenewe guhungirwamo igihe inzu yabo yaterwaga.
Nyuma y’icyo gitero, abakozi bo mu nzego z’ubuvuzi n’ingabo za Israel bahise berekeza i Beersheba gutabara abari barokotse no gushakisha ibisigazwa by’ibisasu.
Abakorerabushake n’abaturage b’ako gace batangiye gukubura ibisigazwa by’ibiturika byari byuzuye mu mihanda.
"Nizeye ko birangiye", ni ko umugabo umwe yabwiye BBC mu gihe yarimo areba ibintu byangiritse.
Ku mugoroba wo ku wa Kabiri, Oren Cohen w’imyaka 45 yari ahagaze hagati y’ibisigazwa by’inzu byari byaridutse mu busitani bwe, inyubako ikaba yari yaraguweho n'igisasu. Yumvaga nta bushake bwo kuyitegereza afite.
Yagize ati: "Nari mfite ubwoba bukomeye cyane ku bana banjye, ubu ni bwo ntangiye kumva neza ibyabaye hano."
Oren yari kumwe n’umugore we n’abana babo batatu — bafite imyaka 8, 12 na 15 — ubwo igitero cyabaga. Avuga ko idirishya rikomeye ry’icyuma ryahise rifunguka bitewe n’umuvuduko w’igiturika.
Mu gihe yavugaga, itsinda ry’abakorerabushake ryari rigeze aho, rije kumufasha gukubura ibisigazwa by’iyo nyubako.
Nyuma y’iki gitero i Beersheba, Israel na Iran byombi byatangaje ko byemeye guhagarika imirwano, ariko hashize akanya gato buri ruhande rutangira gushinjanya ko urundi rwarenze ku masezerano.
Mu gihe abaturage ba Beersheba bagikomeje guhangana n’ingaruka zatewe n’iki gitero gikomeye, baracyibaza niba koko ayo masezerano yo guhagarika imirwano azamara igihe kirekire.
