Kinyarwanda
English
Swahili
Colonel w’Umunyamulenge ukorana na FARDC we n’abarinzi be bakubiswe iz’akabwana
Umukoloneli wo mu bwoko bw’Abanyamulenge wiyunze kuri FARDC na Wazalendo mu kurwanya umutwe wa M23 na Twirwaneho, we n’abarinzi be bakubiswe mu buryo bukomeye, bagirwa intere mbere yo gufungwa n’ubutegetsi bwa Tshisekedi.
Col. Fureko Désiré n’abarinzi be bafashwe mu mpera z’icyumweru gishize, bashinjwa gukorana n’abarwanyi ba AFC/M23 na Twirwaneho.
Amakuru avuga ko kuri ubu afungiye muri kasho i Luvungi, imwe mu gupuruma zo muri sheferi ya Bafulero, muri teritwari ya Uvira, muri Kivu y’Epfo.
Col. Fureko n’abasore umunani bafatanywe babanje gukorerwa iyicarubozo, aho bakubiswe bikomeye, bamburwa imbunda n’impuzankano mbere yo kujugunywa muri Kasho.
Uyu mugabo na Lt. Gen. Masunzu ni bamwe mu bo mu bwoko bw’Abanyamulenge bahawe amafaranga atabarika na Tshisekedi kugira ngo barwanye M23 na Twirwaneho.
Bamwe mu babonye amafoto yasakaye ku mbuga nkoranyambaga baratangaye, bavuga ko Col. Fureko yari yarikundwakaje kuri Leta, none imweretse ko yahetse impyisi.
Hari bamwe bagize bati: “Ntibyumvikana ukuntu ashinjwa gukorana na M23 kandi ari kurwanya uyu mutwe.”
Zimwe mu mbuga z’Abanyamulenge bishimiye ifungwa rya Col. Fureko nk’umunsi Lt. Gen. Masunzu atumizwa i Kinshasa, bemeza ko abagambanyi bose bazahura n’akaga.
Bagaragaza ko Abanyamulenge bahawe amafaranga na Leta ngo bikize bene wabo, nta kabuza ko inzira yo kubikiza ifunguye kandi nta wuzigera abibuka.
Gusa bamwe bavuga ko nubwo Col. Fureko yabagiriye nabi, ibyo yakorewe bishimangira ivangura ryimakajwe n’ubutegetsi bwa Congo, butoteza abo mu bice by’Abanyekongo bavuga Ikinyarwanda.
