Abanyamakuru  babivugiye mu kiganiro cyabahuje n'umuyobozi w'inama nkuru y’igihugu ishinzwe ibitangazamakuru  CNC, muri iki cyumweru, i Bujumbura.

Impamvu muri iki kiganiro abanyamakuru bikije ku mirwano ibera muri Congo, ni uko ngo baba bashaka gukurikirana imibereho y’abasirikare b’Abarundi boherejwe muri iki gihugu. Ikindi kandi iyi mirwano kuba inabera ku mbibi za tumwe mu turere tw’ibihugu byombi  byakabaye bituma bahabwa  amakuru kugirango bamenye n’ingaruka bigira zaba imbi cyangwa inziza.

Esperance Ndayizeye uyobora urwego rushinzwe itangazamakuru mu Burundi, yasobanuye ko gutanga amakuru y’imirwano ibera muri Congo bisaba kuba wabihagazeho kugirango hadatangwa amakuru atariyo.

 Esperance yagize ati:" Gutanga amakuru ku mirwano irimo  ibera mu Burasirazuba  bwa Kongo, ni ukubikora uzi neza ko amakuru urimo gutanga ko ari amakuru watohoje neza, kandi uyatangaza ntaho abogamiye.”

 Yavuze ko kubera ko ikinyamakuru nta muntu kiba cyohereje  ku mirongo y'urugamba gutara amakuru, aribyo bituma amakuru ataboneka neza mu bitangazamakuru bimwe na bimwe.

Uretse kuba abanyamakuru badahabwa amakuru y’intambara ibera muri Congo, ngo n’ibibera mu gihugu biragoye ko babibonaho amakuru kuko ngo usanga ababishinzwe babamaganira kure keretse iyo ari ibitangazamakuru bya Leta.