Ibyavuye mu matora by’agateganyo byatangajwe ku mugoroba wo ku wa Mbere tariki ya 13 Mata 2026 na kamisiyo y’Amatora muri Benin, yatangaje ko Romuald Wadagni, wari usanzwe ari Minisitiri w’Imari, yatsinze amatora ku majwi 94.05%, hashingiwe ku majwi yari amaze kubarurwa agera kuri 90%.

Aya matora yabaye ku Cyumweru tariki ya 12 Mata 2026, yitabirwa ku kigero cya 58.75%, Romuald Wadagni yari ahagarariye ishyaka riri ku butegetsi rya UP-R, akaba agiye gusimbura ku buyobozi Patrice Talon, wayoboye iki gihugu manda ebyiri zikurikirana kuva ku wa 6 Mata 2016 muri manda ya mbere, no kuva ku wa 8 Mata 2021 kugeza mu 2026, aho manda ye yarangiriye.

Abakandida bahataniraga umwanya wa Perezida muri ayo matora ni Romuald Wadagni, wayatsinze ku majwi arenga 94.05%, mu gihe uwo bari bahanganye, Paul Hounkpè, usanzwe ari umuyobozi w’ishyaka ritavuga rumwe n’ubutegetsi muri Benin, yagize amajwi 5.95%.

Nyuma yo gutangazwa kw’ibyavuye mu matora by’agateganyo, Paul Hounkpè yahise yemera ibyavuye mu matora ndetse anifuriza Romuald Wadagni kuzayobora neza.

Perezida wa Komisiyo y’Amatora muri Benin, Sacca Lafia, yatangaje ko igikorwa cyo gutora cyabaye mu mutekano n’ituze mu gihugu hose. Biteganyijwe ko ibyavuye mu matora bya burundu bizatangazwa n’Urukiko rushinzwe kurinda Itegeko Nshinga rya Benin, nubwo uwatsinze yamaze gutangazwa hashingiwe ku majwi y’ibanze.