Mu ijoro ryo ku cyumweru tariki 25 Mutarama 2026, nibwo ikipe ya Manchester United yakinnye na Arsenal FC mu mukino utari woroshye mu kibuga ndetse no hanze yacyo bitewe n'abafana ndetse n'ubukana wari ufite.

Ni umukino wabonetsemo ibitego bigera kuri 5 ariko urangira Manchester United itahanye intsinzi y'ibitego 3-2. Uyu mukino wabereye kuri Emirates Stadium, ikipe ya Manchester United yari imaze igihe itabasha kubona amanota atatu yasuye Arsenal FC kuri Sitade yayo.

Ku munota wa 29, Lisandro Martinez myugariro wa Manchester United, yitsinze igitego nyuma y'igitutu yari hashyizweho na Julian Timber. Ikipe ya Manchester United yaje kucyishyura ku munota wa 37, gitsinzwe na Bryan Mbeumo. 

Ku munota wa 50, ikipe ya Manchester United yabonye igitego cya Kabiri gitsinzwe na Patrick Dorgu wateye ishoti rikomeye umupira tugakubita umutambiko w'izamu ukamanukira mu rucundura. Arsenal FC ku munota wa 84, Mikel Merino yaje kucyishyura ariko nyuma y'iminota itatu gusa Matheus Cuhnaa atsinda igitego cyahesheje intsinzi Manchester United.

Nyuma y'umukino abakinnyi batandukanye ba Manchester United, batangiye gusubiza ubutumwa bw'abakunzi ba Arsenal FC bari bishongoye mbere y'umukino. Umwe mu bakinnyi basubije ni Amad Diallo wasubije umufana wari wavuze ko Arsenal FC iratsinda Manchester United ibitego 4-0.

Mu butumwa Amadi Diallo yashyize nawe hanze nyuma y'umukino, yishongoye kuri Arsenal FC avuga ko ihora yiringiye gutsindira kuri Koroneri abasaba kujya bicisha bugufi. Yagize ati " Ibyiringiro byanyu gusa ni Koroneri, icishe bugufi, mwana."

Ikipe ya Manchester United nyuma yo gutsinda uyu mukino byatumye izamuka ku rutonde rw'agateganyo rwa Shampiyona y'u Bwongereza, kuko yafashe umwanya wa 4 n'amanota 38, mu gihe ikipe ya Arsenal FC gutsindwa byatumye hagati yayo na Manchester City hasigaramo amanota 4 gusa.

Bryan Mbeumo yatsindiye Manchester United igitego cyo kwishyura 

Matheus Cuhnaa yahesheje intsinzi Manchester United