Ibi biganiro byabereye i Paris mu Bufaransa kuri uyu wa Gatandatu tariki ya 21 Gashyantare 2026, byari bigamije kungurana ibitekerezo ku rugendo rw'Ubumwe n'ubudaheranwa, hashingiwe ku ndangagaciro z'umuco Nyarwanda nkuko tubikesha Minisiteri y'Ubumwe bw'Abanyarwanda n'Inshingano Mboneragihugu.

Minisitiri w'Ubumwe bw'Abanyarwanda n'Inshingano Mboneragihugu Dr Jean Damascene Bizimana, wari witabiriye ibyo biganiro byahuje Abanyarwanda baba ku mugabane w'i Burayi, yasabye urubyiruko rw'Abanyarwanda baba kuri uyu kugabane, kudaheranwa n'ibinyoma bivugwa k'u Rwanda bikwirakwizwa ku mbuga nkoranyambaga. Yanavuze ko ikibazo giteye impungenge ku rubyiruko ruri mu mahanga ari ukwiyongera kw'imvugo zivuga nabi u Rwanda zikwirakwizwa n'abakoze Jenoside bahunze ubutabera ndetse n'abahakana Jenoside n'ababashyigikira.

Dr Jean Damascene Bizimana, yasabye urwo rubyiruko kutaba imbohe z'ibinyoma, urwango,  n'ingengabitekerezo zabyo. Rimwe na rimwe babibwamo nabo mu miryango yabo.

Minisitiri Dr Jean Damascene Bizimana, yagize ati" Kwiyemeza gukunda Igihugu kwa buri wese kuza kugaragara nyuma y’ibi biganiro, ni icyemezo kizababohora mwe ubwanyu n’abazabakomokaho. Ikibazo gikomeye cyugarije urubyiruko rutuye mu mahanga kugeza ubu, kigaragarira mu gukwira kw’ibinyoma ku Rwanda bikozwe n’abakoze Jenoside bahunze, abahakana Jenoside n’abayoboke babo bifashishije imbuga nkoranyambaga. Bamwe muri bo ni ababyeyi banyu cyangwa bene wanyu."

Dr Jean Damascene Bizimana yakomeje agira “Ntabwo turi hano ngo tubabwire ibitekerezo bishingiye ku magambo gusa, ahubwo twaje kubagaragariza ibikorwa bifatika, bitanga ibisubizo ku bibazo byanyu, ibyo mwiteze, ibyo mwifuza n’imbogamizi mufite. Ibi biraza kubabera igisubizo kibayobora mu mahitamo yanyu ya none n’ay’ejo hazaza, kugira ngo mushimangire ubumwe bwanyu n’u Rwanda, Igihugu cyanyu cyababyaye."

Yakomeje ati "Ntimukabe imbohe z’ibinyoma byabo, urwango rwabo n’ingengabitekerezo yabo. Icyaha ni gatozi, si icy’umuryango. U Rwanda ni urwacu twese. Amateka ya Jenoside yakorewe Abatutsi yanyigishije ko ubumwe bwacu ari ntavogerwa. Tuburinde twivuye inyuma, tubitewe n’urukundo dukunda Igihugu cyacu, ejo hazaza hacyo n’ah’abazadukomokaho. Uyu munsi, ejo n’ibihe byose.”

Ibiganiro byabereye mujyi wa Paris, byahuje Abanyarwanda baba mu Gihugu cy'u Bufaransa n'ababa mu bindi bihugu byo ku mugabane w'Uburayi basaga 500.