Iyi nama y’iminsi itatu yibanze ku gusuzuma uko umutekano wifashe ku mipaka ihuza u Rwanda na Uganda, gukomeza ibikorwa byubaka amahoro, guteza imbere ubucuruzi n’ibikorwa byambukiranya imipaka, ndetse no kurebera hamwe amahirwe ari mu nzego z’inganda n’ubukerarugendo mu Ntara y’Amajyaruguru.

Ku ruhande rw’u Rwanda, abayobozi bitabiriye iyi nama bayobowe na Major General Ruki Karusisi, uyobora Diviziyo ya 5, na Brigadier General Deo Rusanganwa, uyobora Diviziyo ya 2. Bari kumwe n’abandi bayobozi b’Amadiviziyo ya RDF akorera ku mupaka w’u Rwanda na Uganda.

Ku ruhande rwa UPDF, abayobozi ba Diviziyo ya 2 y’Ingabo zirwanira ku butaka bayobowe na Major General Paul Muhanguzi na bo bitabiriye iyi nama, bagaragaza ubushake bwo gukomeza ubufatanye mu gucunga umutekano ku mipaka.

Inzego za gisivili n’umutekano zo mu bihugu byombi na zo zari zihagarariwe, zirimo Guverineri w’Intara y’Amajyaruguru, Maurice Mugabowagahunde, ndetse n’abahagarariye inzego z’ibanze na Polisi.

Ibiganiro byagarutse ku gusuzuma ishyirwa mu bikorwa ry’imyanzuro yafatiwe mu nama zabanje, by’umwihariko ku bijyanye no kurwanya ibikorwa binyuranyije n’amategeko byambukiranya imipaka, birimo ubucuruzi bwa magendu n’ibindi byahungabanya umutekano.

Abitabiriye inama kandi bunguranye ibitekerezo ku buryo bwo guhangana n’ibibazo bishya by’umutekano, no gushyiraho ingamba zihuriweho zifasha gukomeza kubungabunga amahoro no guteza imbere imibereho y’abaturage batuye mu turere twegereye imipaka.

Iyi nama ya karindwi igaragaza ubushake bw’impande zombi bwo gukomeza ubufatanye mu kubungabunga umutekano no guteza imbere umubano mwiza hagati y’u Rwanda na Uganda, cyane cyane mu bijyanye n’ubucuruzi n’iterambere rirambye ry’uturere duhana imbibi.