Ku wa Gatandatu tariki 14 Gashyantare 2026, nibwo ikipe ya Al Hilal SC ikina shampiyona y’u Rwanda, yakinnye umukino wa nyuma mu itsinda C ndetse yitwara neza imbere ya Saint Eloi Lupopo itahana amanota atatu ku ntsinzi y’igitego 1-0. 

Ikipe ya Al Hilal SC kimwe n’amakipe yandi yabonye itike yo gukina imikino ya ¼ cya CAF Champions League. Aya makipe yose yabonye itike yo gukina iyi mikino ya ¼ muri CAF Champions League yasabwe n’Impuzamashyirahamwe y’umupira w’amaguru muri Afurika, CAF, kohereza Sitade azakiniraho iyi mikino.

CAF irifuza gusuzuma aya masitade azatangwa n’aya makipe kuko hazakoreshwamo ikoranabuhanga rya VAR kuva muri ¼ kugeza ku mukino wa nyuma w’iyi mikino.

Al Hilal SC yatanze Sitade Amahoro ndetse byitezwe ko izemerwa kuko abubatse iyi Sitade bayubatse ku buryo iri koranabuhanga rishobora gukoreshwa. Iri koranabuhanga rya VAR ryakoreshejweho muri Sitade Amahoro harimo gusuzumwa niba byakunda ko rikoreshwa. Wari umukino wahuje ikipe y’abato y’abatarengeje imyaka 16 ya Bayern Munich ndetse n’Intare FTC kandi byagenze neza. 

Sitade Amahoro niyemerwa gukinirwaho imikino ya 1/4 ya CAF Champions League, Al Hilal SC izahakinira umukino ifitanye na RS Berkane yo muri Marocco tariki 20 Werurwe 2026 mu mukino wo kwishyura.

VAR yarakoreshejwe muri Sitade Amahoro