Ku wa Gatanu tariki ya 21 Gashyantare 2026, nibwo Dr Bizimana Jean Damascene, Minisitiri w'Ubumwe bw'Abanyarwanda n'Inshingano Mboneragihugu yagiranye ibiganiro na Khaled El-Enary, Umuyobozi Mukuru w'ishami ry'Umuryango w'Abibumbye ryita ku Burezi, Ubumenyi n' Umuco(UNESCO) nkuko tubikesha Urubuga rwa X rwa Minisiteri y'Ubumwe bw'Abanyarwanda n'Inshingano Mboneragihugu.

Muri ibyo biganiro, Minisitiri w'Ubumwe bw'Abanyarwanda n'Inshingano Mboneragihugu n'umuyobozi Mukuru wa UNESCO, baganiriye ku bijyanye no kubungabunga amateka n'Uburezi nk'inkingi zikomeye mu cyerekezo cyo kwimakaza amahoro arambye. 

Ibyo biganiro byanagarutse ku bufaranye mu iterambere ry'uburezi bufite ireme ndetse budaheza, guteza imbere urubyiruko rwubakirwa ubushobozi n'ikoranabuhanga rigamije guhanga udushya.

Ibi biganiro byabaye mu gihe Abanyarwanda n'Isi yose muri rusange, bitegura kwibuka Jenoside yakorewe Abatutsi mu 1994,  ku nshuro ya 32.

U Rwanda na UNESCO, bisanzwe bifitanye imikoranire n'ubufatanye mu kubaka Igihugu gifite uburezi bufite ireme, guteza imbere ubumenyi n'umuco mu rwego mpuzamahanga, ku kubungabunga ahantu hashyizwe mu murage w'Isi bitewe n'amateka yihariye yakigirwa aho hantu.

Nkuko tubikesha UNESCO, mu nama nyunguranabitekerezo yari igamije kureba imikoranire ya UNESCO n'u Rwanda uko yari  ihagaze nyuma y'imyaka 30 yari ishize habaye Jenoside yakorewe Abatutsi mu 1994, UNESCO yishimiraga intambwe yatewe mu kubaka amahoro arambye. Iyo nama yabaye  muri Gicurasi 2024, mu gihe Abanyarwanda n'Isi yose bari mu  gihe cyo kwibuka Jenoside yakorewe Abatutsi mu 1994, icyo gihe UNESCO, yiyemeje gukomeza gukorana n'u Rwanda mu bikorwa birimo ibigamije gufasha urubyiruko kwitabira ibikorwa byo kwibuka rukabigira umuco.