Aliyekuwa Waziri Mkuu wa Kenya, Raila Amolo Odinga, ameaga dunia ghafla baada ya kuanguka wakati wa matembezi yake ya kawaida ya asubuhi nchini India. Inaripotiwa kuwa kiongozi huyo mwenye umri wa miaka 80 alifariki muda mfupi baada ya kufikishwa katika hospitali binafsi.

Kwa wiki kadhaa zilizopita, Raila alikuwa akipokea matibabu nchini humo, huku taarifa kutoka kwa familia na washirika wake wa karibu zikionyesha kuwa hali yake ilikuwa ikimarika. Wakenya wengi walikuwa wakingoja kwa hamu kurejea kwake nyumbani, wakijawa na matumaini kwamba “Baba” angerudi akiwa mwenye afya njema.

Hata hivyo, taarifa za kifo chake Jumatano, Oktoba 15, zilienea kwa kasi na kuzamisha taifa lote katika simanzi. Barabara, mitandao ya kijamii na majengo ya serikali vilitawaliwa na majonzi, huku maelfu wakitoa rambirambi zao kwa familia ya Odinga.

Katika Bunge la Kitaifa, wabunge wa ODM — chama ambacho Raila alikiongoza kwa zaidi ya miongo miwili — walishindwa kujizuia kulia. Spika wa Bunge, Moses Wetang’ula, alishindwa kuendelea na kikao cha asubuhi kutokana na wingi wa hisia, na kulazimika kukiahirisha ghafla. Hali ya huzuni ilitanda kila kona, ikiwakumbusha Wakenya kuwa mtu aliyewahi kuwa nguzo ya kisiasa sasa ameondoka milele.

Huzuni hiyo ilifananishwa na ndege waliopoteza mti mkubwa uliowapa kivuli na makazi. “Baba,” kama alivyoitwa kwa upendo na wafuasi wake, alikuwa nguzo ya matumaini na uthabiti wa kisiasa kwa vizazi vingi vya Wakenya.

Lakini swali lililosalia ni kama kweli Raila alihisi kuwa siku zake zilikuwa zikikaribia mwisho. Mbunge wa Homa Bay Mjini, Peter Kaluma, amefichua kuwa Raila aliwahi kuzungumzia uwezekano wa kifo chake katika mazungumzo ya faragha na wabunge wa ODM.

“Sijui kama alikuwa anatabiri, lakini alisema mara kadhaa kwamba ikiwa nitazimia na kufa, huu ndio msimamo wa jamii yangu,” alisimulia Kaluma, akionekana kuguswa na maneno hayo yaliyotamkwa na kiongozi huyo siku chache kabla ya mauti.

Hata hivyo, mbunge huyo alikataa kufichua kwa undani yale ambayo Raila aliwausia kuhusu mustakabali wa kisiasa wa ODM na jamii ya Luo Nyanza baada ya kifo chake. “Tumuomboleze mfalme wetu kwanza,” alisema. “Lakini ndani ya siku 30 zijazo, tutakuwa tayari kuwasilisha yale aliyotuachia kama mwongozo wake.”

Kaluma aliongeza kuwa Raila alikuwa tayari ametoa dokezo la mwelekeo wa kisiasa wakati wa mazishi ya marehemu Phoebe Asiyo huko Karachuonyo, ambako aliwahimiza wafuasi wake kuunga mkono serikali kwa ajili ya umoja wa kitaifa.

Kifo cha Raila Odinga kimeacha pengo kubwa katika siasa za Kenya na eneo la Afrika Mashariki kwa ujumla. Mtu aliyepigania mageuzi, demokrasia, na haki za wananchi kwa miongo kadhaa sasa ameaga dunia akiwa bado chachu ya kumbukumbu na msukumo wa kizazi kipya cha viongozi.

Marehemu Raila Amolo Odinga atakumbukwa daima kama sauti ya watu, mpenda amani, na shujaa wa mageuzi.