Msanii mashuhuri wa muziki mwenye asili ya Rwanda, Tabz, aliwavutia mashabiki kwa onyesho lake la kipekee katika Rwanda Cultural Gala and Exhibition 2025 iliyofanyika jijini Nairobi, Kenya. Hafla hiyo iliwaleta pamoja Warwanda na marafiki wa Rwanda wanaoishi nchini Kenya ili kusherehekea utamaduni wao kupitia muziki, chakula, mavazi na maonyesho ya bidhaa asilia za Rwanda.

Katika mahojiano maalum na mwandishi wa UkweliTimes, Tabz alieleza furaha yake kubwa ya kupata mwaliko wa kushiriki katika tukio hili muhimu. “Nimefurahia sana kuungana na Warwanda wenzangu hapa Kenya kusherehekea utamaduni wetu. Ni heshima kubwa kwangu kuimba mbele ya jamii yangu,” alisema Tabz kwa tabasamu.

Wakati wa hafla hiyo, Tabz pia alitumia fursa hiyo kutambulisha wimbo wake mpya unaoitwa “My Way.” Msanii huyo, ambaye hapo awali aliwahi kuwa mwanachama wa Neptunez Band, sasa anajikita zaidi katika kazi yake ya kujitegemea kama msanii wa solo huku akiendelea kuimarisha nafasi yake katika tasnia ya muziki.

Tabz ni mmoja wa waimbaji wenye kipaji cha kipekee kutoka Rwanda, anayejulikana kwa sauti yake ya kuvutia na mtindo wake wa kipekee wa kucheza jukwaani. Alihitimu kutoka Rwanda School of Creative Arts, taasisi inayojulikana kwa kulea vipaji vya muziki ambavyo sasa vinainua muziki wa Rwanda kwenye viwango vya kimataifa.

Akiwa na azma kubwa ya kuendeleza kazi yake, Tabz ameahidi kutoa nyimbo zaidi na kushirikiana na wasanii wakubwa wa ndani na kikanda. “Muziki ni sauti ya utamaduni wetu. Kila ninapoimba, najivunia kuwakilisha Rwanda,” aliongeza Tabz.

Tamasha la Rwanda Cultural Gala and Exhibition 2025 limeendelea kuwa jukwaa muhimu la kukuza urithi wa Rwanda na kuwaunganisha Warwanda wanaoishi nje ya nchi pamoja na marafiki wao, huku muziki ukiwa kiungo muhimu cha umoja huo.

Msanii Tabz Aangaza Katika Tamasha la Rwanda Cultural Gala Nchini Kenya