Ni umuhanda witezweho guhuza Umujyi wa Ruhango unyuze kwa Yezu Nyirimpuhwe, ugakomeza i Kibingo, ukambuka ahitwa i Karambo, ugatunguka i Buhoro, uhuye n’uwa Huye-Kigali mu bice byo hafi yo ku Ntenyo.

Bamwe mu baturiye uyu muhanda bavuga ko ugiye kuzamura agaciro k’agace batuyemo kuko abifuza kubaka bose bashimishwa no kubona imihanda yubakwa.

Umwe muri bo ati “Nta cyiza nko kuba waba ugiye kubaka, ukanyuza ibikoresho ku muhanda wa kaburimbo; utunganye ukomeye. Ni iby’agaciro gakomeye.”

Abihuriyeho n’abafite ubutaka bukora ahazanyura uyu muhanda, bahamya ko bizazamura agaciro kabwo kuko uyu muhanda ugiye gushimangira ko nabo babarirwa mu mujyi bihamye.

Biteganyijwe ko uyu muhanda wa kaburimbo Kibingo-Karambo-Buhoro uzarangira muri Werurwe 2026.

Ubuyobozi bw’Akarere ka Ruhango buvuga ko gukurikirana no kwihutisha imishinga y’ibikorwaremezo n’imihanda irimo, ari imwe mu nkingi z’ingenzi zo guteza imbere imibereho myiza y’abaturage no kugera ku iterambere rirambye.

Habarurema Valens ukayobora, mu 2024 yavuze ko mu gihe cy’imyaka itanu, hazaba huzuye imihanda ya kaburimbo ya kilometero 15 mu mujyi no mu nkengero z’Umujyi wa Ruhango bityo ukarushaho kuba ucyeye koko.

Byibura muri uyu Mujyi wa Ruhango hamaze kuzura imihanda igera ku bilometero 10, mu gihe muri gahunda ya NST2 hazubakwa ibilometero 15, byose muri gahunda yo kurimbisha umujyi no kuwuzamurira agaciro, binafasha abahatuye gutura neza.

Ibi biri kuba kandi mu gihe uyu mujyi ufite intego yiswe ‘Ruhango ikeye’, igamije kurushaho kunoza isuku mu Mujyi wa Ruhango.