Mkutano wa Kimataifa wa Kuunga Mkono Amani na Ustawi katika Ukanda wa Maziwa Makuu, uliofanyika Alhamisi tarehe 30 Oktoba mjini Paris, umebeba uzito mkubwa katika juhudi za kimataifa, baada ya washiriki kuahidi ufadhili wa jumla wa euro bilioni 1.5 kwa ajili ya kusaidia watu walio katika mazingira magumu zaidi.

Tangazo hilo lilitolewa rasmi na Rais wa Ufaransa, Emmanuel Macron, wakati wa ufunguzi wa mkutano huo, ambapo alisisitiza hali mbaya ya kibinadamu inayolikumba eneo hilo.

Akieleza kwa huzuni hali ilivyo katika Jamhuri ya Kidemokrasia ya Kongo (DRC), Rais Macron alisema:

 “Mwanamke hubakwa kila baada ya dakika nne, na mtoto kila baada ya dakika thelathini,”akionyesha namna mateso ya kibinadamu yalivyofikia kiwango cha kutisha.

Aidha, alizungumzia wimbi la watu waliolazimika kuhama makazi yao: watu milioni moja wamekimbia tangu mwanzo wa mwaka, huku jumla ya watu milioni sita wakiwa wametoroka nyumba zao – mamia ya maelfu kati yao wakiwa wakimbizi nje ya nchi. Takriban watu milioni 28 wanakabiliwa na ukosefu wa chakula.

“Takwimu hizi si namba tu,” alisema Rais Macron, “bali ni ishara ya maumivu ya ubinadamu uliojeruhiwa  ni vilio ambavyo dunia haiwezi kupuuza.”

Wito wa mshikamano na ujasiri

Katika hotuba yake, Rais Macron alisifu ujasiri na ustahimilivu wa watu wa Ukanda wa Maziwa Makuu wanaokabiliana na mateso na hali ngumu. Alisisitiza kuwa fedha hizo hazipaswi kuchukuliwa kama msaada wa muda mfupi, bali ni uwekezaji wa muda mrefu kwa ajili ya amani, heshima na mustakabali bora wa mamilioni ya watu.

“Leo, tumepiga hatua muhimu. Najivunia kuona kwamba kwa pamoja mmeweza kuch mobilize zaidi ya euro bilioni 1.5 kwa ajili ya misaada ya kibinadamu,” alisema Macron.

Mkutano huu umeonekana kama hatua kubwa katika juhudi za kimataifa za kukabiliana na dharura za kibinadamu na kuimarisha amani katika eneo hilo, hasa nchini DRC. Pia umeonyesha dhamira ya kisiasa na kifedha ya jumuiya ya kimataifa kusaidia suluhisho endelevu.

Ahadi za kufanyiwa kazi: mafanikio yenye changamoto

Ingawa ahadi ya euro bilioni 1.5 ni ishara yenye nguvu ya mshikamano, wachambuzi wanasema kuwa takriban euro milioni 500 zilikuwa tayari zimeahidiwa mapema mwaka huu, huku sehemu nyingine ikiwa ni ahadi zilizotolewa awali na kurudiwa katika mkutano huo.

Fedha hizo zitagawanywa katika nyanja kuu tatu: msaada wa kibinadamu wa dharura, maendeleo endelevu, na miradi ya ujenzi wa amani. Hata hivyo, ratiba kamili ya kutolewa kwa fedha hizo haijabainishwa wazi, jambo lililotajwa na baadhi ya taasisi za misaada kama changamoto.

Pamoja na hayo, mkutano huo umetambuliwa kuwa ni mafanikio makubwa ya kisiasa, kwani umeirudisha tena ajenda ya Ukanda wa Maziwa Makuu katika meza ya kimataifa, ukiwashirikisha wawakilishi zaidi ya sabini kutoka mataifa mbalimbali, yakiwemo yale yenye nguvu kubwa duniani.

Nchi kadhaa zimetangaza ahadi za ziada, hatua ambayo imeongeza matumaini ya kupatikana kwa amani na uthabiti wa kudumu katika eneo hili lililokumbwa na machungu kwa muda mrefu.

Rais wa Ufaransa Emmanuel Macron akihutubia Mkutano wa Amani na Ustawi wa Ukanda wa Maziwa Makuu mjini Paris, akitangaza msaada wa euro bilioni 1.5 kwa watu wanaokabiliwa na mgogoro wa kibinadamu.