Mu rucyerera rwo kuri uyu wa gatatu tariki 26 werurwe 2025, ikipe y’igihugu ya Argentine yakinnye umukino n’ikipe y’igihugu ya Brazil umukino urangira ikipe ya Argentine ibonye intsinzi y’ibitego 4-1.

Ni umukino wari uryoheye ijisho ariko ikipe y’igihugu ya Brazil yarushijwe cyane na Argentine muri uyu mukino kuko wabonaga ihuzagurika cyane ndetse umukino uza kurangira inatsinzwe mu buryo buteye impungenge.

Abakinnyi batsindiye ikipe y’igihugu ya Argentine, ni Juliane Alvrez ku munota wa 4, Enzo Fernandez ku munota wa 12, Mac Allister ku munota wa 37 ndetse na Simeone ku munota wa 71. Igitego kimwe rukumbi cya Brazil cyatsinzwe na Matheus Cunha ku munota wa 26.

Ikipe y’igihugu ya Argentine nyuma yo kubona intsinzi, byahise bituma ibona itike yo gukina igikombe cy’Isi cyizaba umwaka utaha wa 2026 muri Leta Zunze Ubumwe z’Amerika.

Ikipe y’igihugu ya Argentine muri Amerika y’epfo yagumye ku mwanya wa mbere n’amanota 31 naho ikipe y’igihugu ya Brazil yagumye ku mwanya wa 4 n’amanota 21.

Ikipe z’ibihugu zamaze kubona itike yo gukina igikombe cy’isi bimaze kuba 6. Ibi bihugu birimo Argentine, Iran, Japan, Mexico, USA, Canada ndetse na New Zealand.

Argentina yatsinze ikipe y'igihugu ya Brazil