Mu ijoro ryo ku cyumweru tariki 18 Mutarama 2026, nibwo muri Marocco habaye umukino wa nyuma w'igikombe cy'Afurika nyuma y'ukwezi kiri kubera muri iki gihugu. Ni umukino wahuje ikipe y'igihugu ya Marocco ndetse na Senegal warangiye Senegal itwaye iki gikombe cy'Afurika itsinze Marocco igitego 1-0.

Ni umukino utari woroshye kuko ku munota wa 96, ikipe y'igihugu ya Marocco yahawe Penalite nyuma y'igitego cya Senegal cyari kimaze kwangwa, umukino uhita uhagarara. Ikipe y'igihugu ya Senegal yavuye mu kibuga umukino umara iminota 15 wahagaze, ariko Sadio Mane aza kumbwira abakinnyi bagaruka mu kibuga.

Ikipe y'igihugu ya Marocco yateye Penalite ariko Brahim Diaz arayihusha umukino urakomeza. Ikipe y'igihugu ya Senegal yaje gutsinda igitego ku munota wa 94, gitsinzwe na Pape Gueye, bituma yegukana igikombe.

Uyu mukino wa nyuma w'igikombe cy'Afurika warebwe n'abanyacyubahiro batandukanye ku isi barimo Perezida w'u Rwanda, Paul Kagame, Perezida wa FIFA, Gianni Infantino, Perezida wa CAF, Patrice Motsepe, Umunyamabanga wa Leta muri Minisiteri ya Siporo, Rwego Ngarambe ndetse n'abandi benshi.

Nyuma y'umukino Perezida Paul Kagame abinyujije ku mbuga nkoranyambaga ze, yashimiye ikipe y'igihugu ya Senegal yatwaye igikombe yari ikwiye ndetse yagaragaje kwihangana.

Yagize ati " Dushimiye byimazeyo Intare za Teranga (Senegal) ku ntsinzi ikomeye begukanye mu irushanwa ry'Igikombe cy'Afurika, intsinzi ikwiye kandi igaragaza ukwihangana, ubumwe n’ubuhanga buhanitse."

Perezida kandi yashimiye ikipe y'igihugu ya Marocco ku mikino myiza yagaragaje muri iki gikombe cy'Afurika ndetse n'uko yakiriye abantu bitabiriye iri rushanwa.

Yagize ati " Tunashimiye Marocco ku mikino myiza bagaragaje muri iri rushanwa ryateguwe neza, tunabashimira by’umwihariko ku kwakira neza no ku busabane bagaragaje."

Ikipe y'igihugu ya Senegal yegukanye igikombe cy'Afurika ku nshuro ya Kabiri nyuma y'icyo yegukanye mu mwaka wa 2022. Iyi kipe mu nshuro Eshatu imaze gukina ya nyuma, yatwaye ibikombe inshuro Ebyiri itakaza rimwe. Igikombe cy'Afurika giheruka cyegukanwe n'ikipe y'igihugu ya Côte D'Ivoire.

Perezida Paul Kagame ari mu barebye umukino wa nyuma w'igikombe cy'Afurika 

Gianni Infantino, Paul Kagame na Patrice Motsepe baganira nyuma yo guhurira kuri uyu mukino 

Ikipe y'igihugu ya Senegal yegukanye igikombe ku nshuro ya kabiri 

Ikipe y'igihugu ya Marocco ntabwo byayigendekeye neza muri uyu mukino