Nyuma y’amezi arenga abiri y’iburanisha, abacamanza batatu n’inyangamugayo 12 bagize inteko iburanisha bemeje ko Munyemana yagize uruhare rugaragara mu gutegura no gushyira mu bikorwa Jenoside, ndetse no mu nama zategurirwagamo ibikorwa by’ubwicanyi. Urukiko rwemeje kandi ko yagambaniye indahiro ye nk’umuganga, ubwo yahindukiraga abo yagombaga kurindira ubuzima akabashyira mu nzira y’urupfu.

Uko byari mu rubanza rwa mbere mu 2023, Munyemana yakatiwe igifungo cy’imyaka 24, igihano cyemejwe mu bujurire, bityo kikaba kigiye kubahirizwa mu buryo ntakuka.

Urukiko rwagaragaje ko hari ibimenyetso byinshi bimushinja, birimo:

Kuba yari mu itsinda rito ry’abayobozi bateguraga Jenoside buri munsi, cyane cyane i Tumba mu yahoze ari Perefegitura ya Butare.

Kuba yarashyigikiye guverinoma y’agateganyo yakoze Jenoside asinyira icyifuzo cyayo.

Ubufatanye bwe n’uwahoze ari Minisitiri w’Intebe Jean Kambanda, wakatiwe burundu na ICTR mu 2000.

Abatangabuhamya barenga 60 bumviswe bagarutse ku ruhare rwe, nubwo bamwe baturutse mu Rwanda byateje impaka, cyane cyane ku mutangabuhamya Fabrice Ishimwe, utashoboye kwitaba i Paris nkuko BBC ibivuga.

Mu gihe cyose cy’iburanisha, Munyemana yakomeje kwerekana ko ari “Umuhutu washyiraga mu gaciro” wagiye akiza Abatutsi, ariko urukiko rwavuze ko ibyo ari uburyo bwo kwiyitirira ibikorwa byiza bike mu gihe yifatanyaga mu byaha bikomeye. Inteko iburanisha yanemeje ko nta bimenyetso bifatika byashimangiye ibyo yivugira.

Urukiko rw’u Bufaransa rwashimangiye ko uru rubanza rugomba gufatwa nk’urugero ko “nta muntu n’umwe uri hejuru y’amategeko,” kandi ko abakekwaho Jenoside bazakomeza gukurikiranwa aho bari hose ku isi.