Kinyarwanda
English
Swahili
Nigeria: Abakirisitu 89 bashimuswe n’imitwe yitwaje intwaro barekuwe
Abakirisitu 89 bari bamaze igihe barashimuswe n’imitwe yitwaje intwaro mu majyaruguru ya Nigeria barekuwe kuri uyu wa Kane tariki 5 Gashyantare, basubira mu miryango yabo nyuma y’amezi abiri bagenzurwa n’imitwe yitwaje intwaro.
Nk’uko inzego z’umutekano z’icyo gihugu zabitangaje ni uko abo bakirisitu ari bo bari basigaye bafitwe n’imitwe yitwaje intwaro muri 200 bari bashimutiwe mu bitero byagabwe ku nsengero eshatu zitandukanye ziherereye mu ntara ya Kaduna, ubwo barimo basenga ku wa 18 Mutarama 2025.
Aba bakirisitu biganjemo abagore cyane kurusha abagabo bageze mu mujyi wa Kaduna mu modoka nini itwara abagenzi yari iherekejwe n’inzego z’umutekano bakirwa n’umuyobozi mukuru w’intara ya Kaduna, Uba Sani, wanavuze ko abo baturage bose babanje kwitabwaho no kuvurwa ku bari bameze nabi mbere y’uko basubizwa mu miryango yabo.
Uba Sani yavuze ko nyuma y’abo bakirisitu 89 basubijwe mu miryango yabo ubu nta muturage n’umwe usigaye mu maboko y’abagizi ba nabi.
Yagize ati “Twishimiye ko bose twasanze ari bazima bafite ubuzima bwiza, ubu bose twabohereje mu miryango yabo, ikindi ni uko ubu nta mukirisitu ukiri mu maboko y’imitwe yitwaje intwaro.”
Amakuru ahari ni uko imitwe yitwaje intwaro yari yafashe abo baturage yarimo yaka ingurane y’amafaranga abo mu miryango yabo ndetse na Leta ya Nigeria kugira ngo barekurwe, uretse ko Leta y’icyo gihugu itigeze itangaza uburyo yakoresheje kugira ngo ihabwe abo baturage.
Iyi mibare mishya y’abaturage barekuwe n’imitwe yitwaje intwaro yiyongereye ku y’indi y’abanyeshuri barenga 100 barekuwe mu mpera z’umwaka wa 2025 mu ntara ya Niger.
