Ibi bikubiye mu itangazo ubuyobozi bwa Kiyovu Sports bwashyize ahagaragara kuri uyu wa mbere tariki 12 Ukwakira 2025. Ubuyobozi bwemeza ko bwashyizeho umuyobozi mushya wungirije mu bya Tekenike ndetse n'abakinnyi muri iyi kipe.

Ubuyobozi bwa Kiyovu Sports buvuga ko impamvu bwahisemo uyu mugabo byatewe nuko afite ubunararibonye ndetse n’ubwitange mu iterambere agira mu mupira w’amaguru.

Bagize bati “ Iyi mpamvu y’amahitamo yanyu ishingiye ku bunararibonye mufite, ukwitanga kwanyu mu iterambere ry’umupira w’amaguru, n’ubushobozi bwanyu mu miyoborere. Twizeye ko muzagira uruhare rukomeye mu guteza imbere ubunyamwuga mu mikorere y’ikipe yacu.”

Zimwe mu nshingano uyu muyobozi azaba afite ni uko azakurikirana ndetse akanashyira mu bikorwa ibya tekenike mu nzego zose z’ikipe y’aba mu bato ndetse no mu ikipe nkuru.

Uyu muyobozi azakorana bya hafi n’Umuyobozi mukuru wa Tekiniki n’Umutoza mukuru, bagafatanya gushyiraho imitekerereze y’imikinire y’ikipe no kureba ko ishyirwa mu bikorwa mu buryo buhoraho.

Visi Perezida azaba ashinzwe kandi kugirana ibiganiro n’abakinnyi ku masezerano, kuyongera, cyangwa kuyahagarika, abifatanije n’ishami ry’amategeko n’imari.

Kugeza ubu Kiyovu Sports iyobowe na Nkurunziza David ariko ntabwo abakunzi b’iyi kipe baranyurwa n’uko ayoboye ikipe yabo. Kiyovu Sports imaze gutsinda umukino umwe mu mikino itatu ndetse ubu yicaye ku mwanya wa 10.

Hadj Manirakiza Obeid Ahmed yagizwe Visi Perezida wa Kabiri wa Kiyovu Sports