Kinyarwanda
English
Monusco yasabye ubutegetsi bwa DRC gukora iperereza ku gitero cy'i Bukavu
Umuryango w'Abibumbye muri Repubulika Iharanira Demokarasi ya Congo MONUSCO, yasabye Leta ya Congo gukora iperereza ryihuse ku gitero giherutse kugabwa mu baturage bari bateraniye mu nama yateguwe na AFC/M23 mu Mujyi wa Bukavu.
Bintou Keita, uyobora Monusco, yamaganye iki gitero cyahitanye abarenga 10 mu mujyi wa Bukavu, umurwa mukuru w'Intara ya Sud-Kivu. Ni igitero cyabaye kuwa kane tariki ya 27 Gashyantare.
Mu itangazo yashyizeho umukono kuwa gatanu tariki ya 28 Gashyantare, Bintou Keita yanenze iki gitero cyakoresheje ibisasu mu baturage, kigahitana abatri bacye ndetse n’abakomeretse babarirwa hejuru ya 70.
MONUSCO yasabye ubuyobozi bwa Congo gutangira iperereza kugira ngo hamenyekane abagabye iki gitero kandi bashyikirizwe ubutabera.
Madamu Keita yanenze kandi ibitero birimo gukorerwa abaturage mu karere ka Beni mu Majyaruguru y'Intara ya Kivu ndetse no muri Ituri hakomeje ibikorwa by'iterabwoba bikorwa na ADF hamwe n’imitwe yitwaje intwaro CODECO.
Lawrence Kanyuka umuvugizi wa AFC/M23 mu bya Politiki, abinyujije ku rukuta rwa X, yavuze ko bashimishijwe n'uko Monusco yamaganye icyo gitero ariko yibutsa ko ngo Tshisekedi na Bitakwira bakomeje gahunda yabo yo gukorera ibikorwa by'iterabwoba no kugaba ibitero ku baturage b'inzirakarengane i Uvira na Minembwe."
